საარჩევნო პროცესში ელექტრონული ტექნოლოგიების დანერგვის უპირატესობებზე და აღნიშნულ პროცესში ახალგაზრდა ამომრჩევლების როლზე ისაუბრეს დღეს ცესკოში გამართულ შეხვედრაზე, სადაც ადმინისტრაციამ სტუდენტებს უმასპინძლა. ივანე ჯავახიშვილის სახელობის თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის სტუდენტური თვითმმართველობის წარმომადგენლებს, ცესკოს თავმჯდომარის მოადგილე გიორგი შარაბიძე შეხვდა. როგორც მან აღნიშნა, მსგავსი ტიპის შეხვედრები ახალგაზრდებთან  მნიშვნელოვანია, რადგან მათ საშუალება აქვთ პირადად გაეცნონ იმ ტექნოლოგიების მუშაობას, რომელსაც ადმინისტრაცია 2023 წლის შუალედურ/რიგგარეშე, ასევე მომავალ საერთო არჩევნებზე დიდი მასშტაბით გამოიყენებს.

საარჩევნო ადმინისტრაციის მიერ უკვე განხორციელებული საპილოტე პროექტების და ამ მიმართულებით არსებული გამოცდილების შესახებ, შეხვედრის მიმდინარეობის დროს, დეტალურად ისაუბრა საარჩევნო სისტემების განვითარების, რეფორმებისა და სწავლების ცენტრის ტრენერმა ნინო კიკალიშვილმა, რომელმაც ახალგაზრდებს ტექნოლოგიების გამოყენების დადებითი მხარეების შესახებ მიაწოდა ინფორმაცია.

ღია კარის დღის ფარგლებში სტუდენტები დეტალურად გაეცნენ და პრაქტიკაში გამოცადეს ელექტრონული საარჩევნო ტექნოლოგიების - ვერიფიკაციის, ხმის მიცემისა და დათვლის აპარატების მუშაობა.

ახალგაზრდების ვიზიტი ცესკოში ივანე ჯავახიშვილის სახელობის თბილისის სახელმწიფო უნივერსიტეტის სტუდენტების ინიციატივით განხორციელდა.