2023 წლის 14 მარტს ევროპის საბჭოსა და საქართველოს საგარეო საქმეთა სამინისტროს ორგანიზებით მმართველი კომიტეტის სხდომა გაიმართა, სადაც სხვა ჩართულ მხარეებთან ერთად მონაწილეობა ცესკოსა და სწავლების ცენტრის ხელმძღვანელმა პირებმა მიიღეს.
შეხვედრის მონაწილეებს სიტყვით მიმართეს საგარეო საქმეთა მინისტრის მოადგილემ ლაშა დარსალიამ და ევროპის საბჭოს პროგრამების კოორდინაციის დირექტორმა კლაუს ნეუკირჩმა. ღონისძიებაზე დამსწრე ინსტიტუციების წარმომადგენლებმა შეაფასეს ევროპის საბჭოს 2020-2023 წლის სამოქმედო გეგმის განხორციელების პროგრესი, გამოწვევები და 2024-2027 წლების სამოქმედო გეგმაში გასათვალისწინებელ პრიორიტეტულ საკითხებზე იმსჯელეს.
დემოკრატიულ მმართველობასთან დაკავშირებულ პანელურ სესიაზე სიტყვით გამოვიდნენ ცესკოს თავმჯდომარე გიორგი კალანდარიშვილი და სწავლების ცენტრის დირექტორი ნათია ზაალიშვილი, რომლებმაც დეტალურად ისაუბრეს ცესკოსა და სწავლების ცენტრის საქმიანობასა და იმ პროექტებზე, რომლებიც ევროპის საბჭოს მხარდაჭერით განხორციელდა, ასევე ყურადღება გაამახვილეს სამომავლო თანამშრომლობის არეალებზე.
ევროპის საბჭოს საქართველოს ოფისის მხარდაჭერით განხორციელებული და დაგეგმილი პროგრამების მიზანია საქართველოს მხარდაჭერა ევროპის საბჭოს სტანდარტების შესრულებაში ადამიანის უფლებათა დაცვის, კანონის უზენაესობისა და დემოკრატიის გაძლიერების მიმართულებით.
