2017 წლის 5 - 6 დეკემბერს, საპარლამენტო სწავლებების საერთაშორისო ცენტრის (ICPS) და იორდანიის დამოუკიდებელი საარჩევნო კომისიის მიწვევით, ცესკოს და სწავლების ცენტრის წარმომადგენლები იორდანიაში იმყოფებოდნენ, სადაც საარჩევნო საკითხთა მე-15 საერთაშორისო სიმპოზიუმში მიიღეს მონაწილეობა.

ღონისძიებაში ცესკოს თავმჯდომარე თამარ ჟვანია, ცესკოს თავმჯდომარის მოადგილე გიორგი შარაბიძე, ცესკოს წევრი ზურაბ ხრიკაძე და ცესკოს სწავლების ცენტრის დირექტორი ნათია ზაალიშვილი მონაწილეობდნენ.

საერთაშორისო სიმპოზიუმზე განიხილეს სხვადასხვა აქტუალური საარჩევნო საკითხები, ასევე, ღონისძიების ფარგლებში, გაიმართა დაჯილდოების ცერემონია, სადაც საერთაშორისო დაჯილდოების კომისიის გადაწყვეტილებით გამოვლინდა გამარჯვებული საარჩევნო ადმინისტრაციები სხვადასხვა საარჩევნო ნომინაციაზე.

საქართველოს საარჩევნო ადმინისტრაციამ ჯილდო ორ ნომინაციაში - „მოქალაქეთა ჩართულობა“ და „საარჩევნო კონფლიქტების მართვა“ მიიღო. „მოქალაქეთა ჩართულობის“ ჯილდო საარჩევნო ადმინისტრაციამ პროექტისთვის „ვესაუბრებით ამომრჩეველს“ მოიპოვა. პროექტი 2017 წლის თვითმმართველობის არჩევნებთან დაკავშირებით ამომრჩეველთა ინფორმირების, საარჩევნო ადმინისტრაციასა და ამომრჩევლებს შორის კომუნიკაციის გაძლიერებისა და ამომრჩევლებისთვის შეთავაზებული სერვისების გაუმჯობესების მიზნით განხორციელდა. აღნიშნულ ნომინაციაში ფინალისტთა შორის ასევე იყვნენ ბულგარეთის, ინდოეთის და ბოცვანას საარჩევნო ადმინისტრაციები.

„საარჩევნო კონფლიქტების მართვაში“ კი ჯილდო საქართველოს საარჩევნო ადმინისტრაციას არჩევნების უსაფრთხოების მიმართულებით განხორციელებული საქმიანობისთვის გადაეცა. პროექტი, რომელიც 2016 და 2017 წლების არჩევნებისთვის შინაგან საქმეთა სამინისტროსთან თანამშრომლობით განხორციელდა, შესაბამისი უწყებების კოორდინირებულ მუშაობასა და უსაფრთხო საარჩევნო გარემოს შექმნას ითვალისწინებდა. ნომინაციაში ფინალისტთა შორის საქართველოსთან ერთად არგენტინა, ავღანეთი და კოლუმბია იყვნენ.

საერთაშორისო დაჯილდოების კომიტეტის შემადგენლობაში შედიოდნენ ევროპარლამენტის, ვენეციის კომისიის, ეუთოს, საარჩევნო სისტემების საერთაშორისო ფონდის (IFES) და საპარლამენტო სწავლებების საერთაშორისო ცენტრის (ICPS) წარმომადგენლები. სწავლების ცენტრის დირექტორი ნათია ზაალიშვილი აღნიშნული კომიტეტის წევრია 2014 წლიდან.

საერთაშორისო საარჩევნო დაჯილდოების ცერემონიაში, რომელიც უკვე რამდენიმე წელია საპარლამენტო სწავლებების საერთაშორისო ცენტრის (ICPS) ორგანიზებით, საერთაშორისო საარჩევნო სიმპოზიუმის ფარგლებში იმართება, 45 ქვეყნის 200-მდე წარმომადგენელმა მიიღო მონაწილეობა.

აღსანიშნავია, რომ საერთაშორისო საარჩევნო ჯილდოს მფლობელი საქართველოს საარჩევნო ადმინისტრაცია წელს უკვე მეოთხედ გახდა. პირველი ჯილდო ცესკოს სწავლების ცენტრმა ნომინაციაში - ”პირველი ამომრჩეველი” - 2013 წელს მოიპოვა. 2015 წელს საარჩევნო ადმინისტრაცია „არჩევნების მართვის“ ნომინაციაში გახდა გამარჯვებული, 2016 წელს კი ცესკო ორ ნომინაციაში - „უმცირესობების ჩართულობა“ და „მოქალაქეების ჩართულობა“ ფინალისტთა შორის იყო და გამარჯვება „უმცირესობების ჩართულობის“ ნომინაციაში მოიპოვა.