საარჩევნო ადმინისტრაციამ დღეს ივანე ჯავახიშვილის სახელობის თბილისის სახელმწიფო უნივერსიტეტის სტუდენტებს უმასპინძლა. შეხვედრა ცენტრალური საარჩევნო კომისიის (ცესკო) თავმჯდომარის მოადგილე გიორგი შარაბიძემ გახსნა და საარჩევნო პროცესებში ახალგაზრდების ჩართულობის მნიშვნელობაზე ისაუბრა.
„შეხვედრა იყო ძალიან საინტერესო, ყოველთვის მოხარული ვარ ახალგაზრდებთან საუბრის. ვფიქრობ, ასეთი ტიპის შეხვედრები არის სასარგებლო არა მხოლოდ იმ სტუდენტებისთვის, რომლებიც ჩვენთან მოდიან, არამედ საარჩევნო ადმინისტრაციისთვის მთლიანად. ჩვენ ვისაუბრეთ იმ გამოწვევებზე რომელიც არსებობს საქართველოს სინამდვილეში არჩევნებთან მიმართებაში გვქონდა ძალიან საინტერესო დისკუსია. ამავე დროს ახალგაზრდებმა ნახეს ის ტექნოლოგიები, რომელიც მომავალში საქართველოში დაინერგება საარჩევნო პროცესისას“, -აღნიშნა გიორგი შარაბიძემ.
ელექტრონული ტექნოლოგიების დანერგვის მიმართულებით როგორც საქართველოს საარჩევნო ადმინისტრაციის, ისე სხვა ქვეყნების გამოცდილება, ინფორმაცია განხორციელებული საპილოტე პროექტებისა და ტექნოლოგიების გამოყენების დადებითი მხარეების შესახებ - ამ საკითხებზე სტუდენტებს ინფორმაცია ცესკოს საარჩევნო სისტემების განვითარების, რეფორმებისა და სწავლების ცენტრის ტრენერებმა ნინო კიკალიშვილმა და ცოტნე ზაბახიძემ მიაწოდეს. სტუდენტები ასევე დეტალურად გაეცნენ და პრაქტიკაში გამოცადეს ელექტრონული საარჩევნო ტექნოლოგიების - ვერიფიკაციის, ხმის მიცემისა და დათვლის აპარატების მუშაობა.
ივანე ჯავახიშვილის სახელობის თბილისის სახელმწიფო უნივერსიტეტის სტუდენტებთან შეხვედრა დღეს ცენტრალურ საარჩევნო კომისიაში გაიმართა.
