ცენტრალური საარჩევნო  კომისიისა (ცესკო) და საარჩევნო სისტემების განვითარების, რეფორმებისა და სწავლების ცენტრის (სწავლების ცენტრი) წარმომადგენლებმა მოლდოვას ცენტრალური საარჩევნო კომისიის დაარსებიდან 25 წლის იუბილესადმი მიძღვნილ ღონისძიებებში მიიღეს მონაწილეობა.

საიუბილეო ღონისძიებების ფარგლებში საარჩევნო ადმინისტრაციის წარმომადგენლები 22 ნოემბერს კიშინიოვში საერთაშორისო კონფერენციას „საარჩევნო რეფორმა - მონაწილეობითი დემოკრატიის გაძლიერება, როგორც პრიორიტეტი“ დაესწრნენ. საქართველოს საარჩევნო ადმინისტრაციის გამოცდილება საარჩევნო საკითხებისა და ელექტრონული ტექნოლოგიების დანერგვის მიმართულებით, ასევე ინფორმაცია განხორციელებული საპილოტე პროექტების შესახებ კონფერენციის მონაწილეებს საფინანსო დეპარტამენტის უფროსმა ოთარ ბუსკივაძემ  გააცნო. კონფერენციის მონაწილეებმა, სხვადასხვა ქვეყნის საარჩევნო ადმინისტრაციების წარმომადგენლებმა ერთმანეთს საარჩევნო საკითხებზე გამოცდილება გაუზიარეს და ისეთ მნიშვნელოვან თემებზე იმსჯელეს, როგორიცაა საარჩევნო ადმინისტრაციების როლი საარჩევნო რეფორმებში, პარტნიორი ორგანიზაციების როლი საარჩევნო პრაქტიკისა და კანონმდებლობის გაუმჯობესებაში.

საფინანსო დეპარტამენტის უფროსი ოთარ ბუსკივაძე, იურიდიული დეპარტამენტის უფროსი გიორგი სანტურიანი, სწავლების ცენტრის სასწავლო პროგრამების სამსახურის უფროსი მაია გუდაძე და წამყვანი ტრენერი ნინო კიკალიშვილი კიშინიოვში გამართულ ღონისძიებებს მოლდოვას ცენტრალური საარჩევნო კომისიის მიწვევით დაესწრნენ. საიუბილეო ღონისძიებებში მონაწილეობა 20-ზე მეტი ქვეყნის საარჩევნო ადმინისტრაციის, ადგილობრივი და საერთაშორისო ორგანიზაციების წარმომადგენლებმა მიიღეს.