საარჩევნო ადმინისტრაცია ჩრდილოეთ მაკედონიის საარჩევნო ადმინისტრაციის წარმომადგენლებს მასპინძლობს. ორი ქვეყნის საარჩევნო ადმინისტრაციის ხელმძღვანელი პირების შეხვედრა დღეს ცენტრალურ საარჩევნო კომისიაში (ცესკო) გაიმართა. ცესკოს თავმჯდომარე გიორგი კალანდარიშვილმა კოლეგებს 2021-2022 წლებში განხორციელებული სიახლეები გააცნო.

„საარჩევნო ადმინისტრაციებს შორის გამოცდილების გაზიარება ძალიან მნიშვნელოვანია. დღეს ჩვენ გვაქვს შესაძლებლობა ჩრდილოეთ მაკედონიის საარჩევნო ადმინისტრაციის დელეგაციას გავუზიაროთ ინფორმაცია იმ რეფორმებისა და სიახლეების შესახებ, რომელსაც საქართველოს საარჩევნო ადმინისტრაცია ახორციელებს და ასევე გავეცნოთ მათ გამოცდილებას ტექნოლოგიურ სიახლეებთან მიმართებაში“, - აღნიშნა გიორგი კალანდარიშვილმა.

არჩევნებზე საპილოტე პროექტის ფარგლებში ელექტრონული საშუალებების წარმატებით გამოყენების შესახებ შეხვედრაზე დეტალურად ისაუბრა ცესკოს საარჩევნო საინფორმაციო ტექნოლოგიების დეპარტამენტის ხელმძღვანელმა კახა ჟამურაშვილმა.

როგორც ჩრდილოეთ მაკედონიის საარჩევნო ადმინისტრაციის თავმჯდომარემ აღნიშნა, დელეგაცია განსაკუთრებით დაინტერესებულია ცესკოს საარჩევნო სისტემების განვითარების, რეფორმებისა და სწავლების ცენტრის (სწავლების ცენტრი) მუშაობით, რადგან ჩრდილოეთ მაკედონიის საარჩევნო ადმინისტრაცია ასევე გეგმავს მსგავსი სასწავლო ცენტრის ჩამოყალიბებას.

„ჩვენი ვიზიტის მთავარ მიზანს ცესკოსთან არსებული სასწავლო ცენტრის ფუნქციონირების, საქმიანობის შესწავლა და გამოცდილების გაზიარება წარმოადგენს. წარმატებული შეხვედრა გვქონდა ცენტრალური საარჩევნო კომისიის თავმჯდომარესთან, სადაც მნიშვნელოვანი საკითხები განვიხილეთ. ვფიქრობ, რომ აღნიშნული შეხვედრა მნიშვნელოვანია ორივე ქვეყნისთვის და ხელს შეუწყობს ჩვენი მომავალი თანამშრომლობის გაღრმავებას“,- განაცხადა ალექსანდარ დაშტევსკიმ.

ცესკოს სწავლების ცენტრის ხელმძღვანელმა ნათია ზაალიშვილმა დელეგაციის წარმომადგენლებს პრეზენტაციაზე დეტალური ინფორმაცია მიაწოდა სწავლების ცენტრის საქმიანობის შესახებ. აღსანიშნავია, რომ ვიზიტის ფარგლებში ჩრდილოეთ მაკედონიის საარჩევნო ადმინისტრაციის წარმომადგენლები სწავლების ცენტრში სამუშაო პროცესს პირადად გაეცნობიან. ასევე დაგეგმილია დელეგაციის შეხვედრა ბორჯომის საოლქო საარჩევნო კომისიასთან.

ჩრდილოეთ მაკედონიის დელეგაცია საქართველოში საარჩევნო სისტემების საერთაშორისო ფონდის (IFES) მხარდაჭერით იმყოფება.