თბილისსა და საქართველოს 7 მუნიციპალიტეტში ცესკოს სასწავლო პროექტი „საარჩევნო განვითარების სკოლა“ მიმდინარეობს. 18-25 წლის ახალგაზრდები ინფორმაციას ისეთ მნიშვნელოვან საკითხებთან დაკავშირებით იღებენ, როგორებიცაა: საარჩევნო სისტემები, საარჩევნო ადმინისტრაცია, 1919 წლის დამფუძნებელი კრების არჩევნები, დემოკრატიული საარჩევნო პრინციპები, არჩევითი ორგანოები საქართველოში, არჩევნებში ჩართული მხარეები, არჩევნების გამჭვირვალობა და ხელმისაწვდომობა, გენდერული თანასწორობა,  ხმის მიცემის და დათვლის ელექტრონული საშუალებები, დეზინფორმაცია და ყალბი ცნობების გავრცელება საარჩევნო პერიოდში.

მონაწილეები დამატებით გაივლიან საარჩევნო ადმინისტრაციის მოხელეთა გამოცდისთვის მოსამზადებელ სასწავლო პროგრამას, რომელიც ეფუძნება საარჩევნო კანონმდებლობას, საქართველოს კონსტიტუციას, საგამოცდო პროგრამით განსაზღვრული საკითხების შინაარსობრივ განხილვას და პრაქტიკულ დავალებებს.

სასწავლო კურსი  თბილისში, თელავში, რუსთავში, გორში, ახალციხეში, ქუთაისში, ზუგდიდსა და ბათუმში 4 ივლისს დაიწყო და 8 ივლისს დასრულდება.

საგანმანათლებლო პროექტი „საარჩევნო განვითარების სკოლა“ ცესკოს სწავლების ცენტრთან ერთად და საარჩევნო სისტემების საერთაშორისო ფონდის (IFES) მხარდაჭერით ხორციელდება და მიზნად ისახავს სამოქალაქო ჩართულობის ხელშეწყობასა და არჩევნების პოპულარიზაციას ახალგაზრდებში. 2015 წლიდან სწავლება 3000-მდე ახალგაზრდამ გაიარა.