8 ივნისს ცენტრალური საარჩევნო კომისიის (ცესკო) გენდერული თანასწორობის საბჭო ქალთა უფლებებზე მომუშავე ადგილობრივ არასამთავრობო და საერთაშორისო ორგანიზაციების წარმომადგენლებს  შეხვდა. შეხვედრა, რომელიც საარჩევნო სისტემების საერთაშორისო ფონდთან (IFES) თანამშრომლობით გაიმართა, ცესკოს წევრმა და ამავდროულად გენდერული თანასწორობის საბჭოს თავმჯდომარე მაია ზარიძემ IFES-ის გენდერის და ინკლუზიის მენეჯერ მირანდა ტყაბლაძესთან ერთად გახსნა.

მაია ზარიძემ მონაწილეებს გენდერული თანასწორობის საბჭოს პოლიტიკა და ის სამოქმედო გეგმა გააცნო, რომლის განხორციელებასაც საარჩევნო ადმინისტრაცია ამ მიმართულებით 2022 – 2023 წლებში აპირებს.

შეხვედრის ფარგლებში მხარეებმა გენდერული პორტალის გაუმჯობესების საკითხზე იმსჯელეს. ცესკოს, ადგილობრივი და საერთაშორისო ორგანიზაციების წარმომადგენლებმა ქალი კანდიდატების, ამომრჩევლებისა და  ზოგადად გენდერული სტატისტიკის შესახებ განახლებადი ინფორმაციის მნიშვნელობაზე ისაუბრეს. შეხვედრაზე იმსჯელეს გენდერული პორტალის შესაძლებლობებზე, ასევე გენდერულ ჭრილში რა სახის ინფორმაციის მოძიება შეუძლიათ დაინტერესებულ მხარეებს აღნიშნული პორტალის საშუალებით. 

როგორც საბჭოს თავმჯდომარე მაია ზარიძემ სამუშაო შეხვედრაზე განაცხადა პორტალის განახლებისთვის მნიშვნელოვანია არასამთავრობო ორგანიზაციებთან აქტიური და მჭიდრო თანამშრომლობა,  მათი რეკომენდაციებისა და მიგნებების გათვალისწინება. პორტალის გაუმჯობესების პროექტი შეხვედრის მონაწილეებს ცესკოს კოორდინაციის, დაგეგმვისა და ანგარიშგების დეპარტამენტის უფროსმა სოფიო სიჭინავამ წარუდგინა და იმ სიახლეებზე ისაუბრა, რომელსაც გენდერული თანასწორობის საბჭო პორტალის გასაუმჯობესებლად გეგმავს.

შეხვედრაზე ასევე იმსჯელეს ჩართულ მხარეებთან ურთიერთობის გაღრმავების გზებსა და სამომავლო თანამშრომლობაზე.

გენდერული პორტალი 2020 წელს საარჩევნო სისტემების საერთაშორისო ფონდთან (IFES) თანამშრომლობით შეიქმნა და მომხმარებლებს საშუალებას აძლევს მიიღონ საარჩევნო ადმინისტრაციის მიერ არჩევნების შესახებ გენდერულ ჭრილში დამუშავებული სტატისტიკური ინფორმაცია.