საარჩევნო ადმინისტრაცია აგრძელებს საარჩევნო პროცესებში ახალგაზრდების ჩართულობის ხელშეწყობის მიზნით საინფორმაციო-სასწავლო კამპანიის განხორციელებას. სწორედ ამ კამპანიის ფარგლებში, ცესკოს თავმჯდომარე გიორგი კალანდარიშვილი საქართველოს სტუდენტური პარლამენტის წარმომადგენლებს შეხვდა. ცესკოს თავმჯდომარემ ახალგაზრდებთან საარჩევნო რეფორმებზე, საარჩევნო ადმინისტრაციის საქმიანობაზე, გამოწვევებსა და მიღწევებზე ისაუბრა. მან საარჩევნო ტექნოლოგიებზეც გაამახვილა ყურადღება და სტუდენტებს დეტალურად გააცნო ინფორმაცია საპილოტე პროექტის შესახებ, რომელიც საარჩევნო პროცესებში საარჩევნო ტექნოლოგიების დანერგვას გულისხმობს.
ცესკოს სწავლების ცენტრის ხელმძღვანელი ნათია ზაალიშვილი ახალგაზრდებს ამომრჩევლების ინფორმირების მნიშვნელობაზე ესაუბრა, გააცნო საერთაშორისო ტენდენციები არჩევნებში ტექნოლოგიების გამოყენების მიმართულებით და განიხილა საქართველოს გამოცდილება კენჭისყრის პროცესში ამომრჩეველთა ვერიფიკაციისა და ხმის ელექტრონული მთვლელი აპარატების გამოყენების შესახებ. მეტი თვალსაჩინოებისთვის საქართველოს სტუდენტური პარლამენტის წევრები უშუალოდ ჩაერთნენ საარჩევნო ტექნოლოგიების გამოყენებით ხმის მიცემის სიმულაციაში. კენჭისყრის ინსცენირებას ცესკოს სწავლების ცენტრმა გაუწია ორგანიზება.
საინფორმაციო-სასწავლო კამპანია „ახალგაზრდების ჩართულობის ხელშეწყობა ღია მმართველობის პროცესში“, ორიენტირებულია საარჩევნო ადმინისტრაციის საქმიანობის პოპულარიზაციაზე, ცნობადობის ზრდაზე და ხელს უწყობს ახალგაზრდების აქტიურ, ინფორმირებულ ამომრჩევლებად ჩამოყალიბებას.
