ცენტრალური საარჩევნო კომისია (ცესკო) აქტიურად აგრძელებს მუშაობას ინკლუზიური საარჩევნო გარემოს გაუმჯობესებისთვის. ამ მიზნით, დღეს ცესკოში შექმნილი შეზღუდული შესაძლებლობების მქონე პირთა საკითხებზე მომუშავე ჯგუფის დისტანციური შეხვედრა გაიმართა. შეხვედრის ფარგლებში განიხილეს სახალხო დამცველის 2020 წლის რეკომენდაცია შშმ პირთა არჩევნებში მონაწილეობის ოფიციალური სტატისტიკის შესახებ. სამუშაო ჯგუფის წევრები ამ საკითხზე ცესკოს მიერ ჩატარებულ კვლევას გაეცნენ, სადაც სხვადასხვა ქვეყნის მაგალითია განხილული, თუ როგორ აღრიცხავენ არჩევნებში მონაწილე შშმ პირთა სტატისტიკას. ჯგუფის ხელმძღვანელმა სოფიო სიჭინავამ შეხვედრის მონაწილეებთან დისკუსია წარმართა კვლევის შედეგებისა და საქართველოში არსებული პრაქტიკის თაობაზე.
ინკლუზიური საარჩევნო გარემოს ხელშეწყობის მიზნით დაგეგმილია სხვადასხვა სახის სასწავლო პროგრამები, რომლებსაც ცესკოს საარჩევნო სისტემების განვითარების, რეფორმებისა და სწავლების ცენტრი, როგორც საჯარო სკოლებში, ისე უმაღლეს სასწავლებლებშიც განახორციელებს.
შეხვედრას ცესკოს კოორდინაციის, დაგეგმვისა და ანგარიშგების დეპარტამენტის უფროსი და ამავე დროს სამუშაო ჯგუფის ხელმძღვანელი სოფიო სიჭინავა უძღვებოდა. მასთან ერთად აქტიურად იყო ჩართული შეხვედრაში ცესკოს სწავლების ცენტრის ხელმძღვანელი ნათია ზაალიშვილი.
