2021 წლის 2 ოქტომბრის მუნიციპალიტეტის ორგანოთა არჩევნებისთვის N4 კრწანისის საარჩევნო ოლქში ტექნოლოგიების გამოყენებით საპილოტე პროექტის განსახორციელებლად, საუბნო საარჩევნო კომისიების წევრები ინტენსიურ სწავლებას გადიან.

26 სექტემბერს იწყება ტრენინგების მორიგი ეტაპი, რომელიც ეთმობა საუბნო საარჩევნო კომისიების ხელმძღვანელი პირების (თავმჯდომარე, მოადგილე, მდივანი) გადამზადებას. სწავლების ცენტრის მიერ შემუშავებული კონცეფციის შესაბამისად, 17-25 სექტემბრის პერიოდში ტრენინგები ჩაუტარდა 31-ვე საუბნო საარჩევნო კომისიის სრულ შემადგენლობას.

პრაქტიკულ სწავლებაზე დაფუძნებით, საპილოტე პროექტისთვის გათვალისწინებული პროცედურული სიახლეების ჭრილში კომისიების წევრები გაეცნობიან საუბნო საარჩევნო კომისიის კენჭისყრის შედეგების შემაჯამებელი ოქმების შედგენის ტექნიკას; კენჭისყრის დღის განცხადებების/საჩივრების წარდგენის წესსა და რეაგირების მექანიზმებს.

სასწავლო პროცესი პანდემიასთან დაკავშირებული ყველა რეკომენდაციის დაცვით მიმდინარეობს. სწავლების ცენტრის მიერ გადამზადებული ტრენერები ტრენინგების ჩატარებას უზრუნველყოფენ 26-27 სექტემბრის პერიოდში. გრაფიკი ხელმისაწვდომია ბმულზე. მასში ცვლილებების განხორციელების შემთხვევაში, ინფორმაცია აისახება დაუყოვნებლივ.