საქართველოს ცენტრალური საარჩევნო კომისიისა და საქართველოს სასჯელაღსრულების, პრობაციისა და იურიდიული დახმარების საკითხთა სამინისტროს მიერ ინიცირებული ერთობლივი პროექტის ფარგლებში დაიგეგმა ფართომასშტაბიანი საგანმანათლებლო პროგრამის განხორციელება სასჯელაღსრულების სისტემის თანამშრომლებისა და ხმის მიცემის უფლების მქონე პატიმრებისათვის. 

ცესკოსა და სამინისტროს ეგიდით სასწავლო პროგრამას განახორციელებენ საარჩევნო სისტემების განვითარების, რეფორმებისა და სწავლების ცენტრი და  სასჯელაღსრულებისა და პრობაციის სასწავლო ცენტრი.

პროექტი სამ ეტაპს მოიცავს:

I ეტაპი - სასჯელაღსრულების სისტემის თანამშრომელთა გადამზადება (ტრენერთა ტრენინგი)

II ეტაპი - ტრენერთა მიერ სასწავლო პროგრამის განხორციელება 18 სასჯაღსრულების დაწესებულების თანამშრომლებისათვის (14 სასჯელაღსრულების დაწესებულება აღმოსავლეთ საქართველოში, 4 - დასავლეთ საქართველოში)

III ეტაპი - ხმის მიცემის უფლების მქონე პატიმრების ინფორმირებულობის უზრუნველყოფა

პროექტის I ეტაპის განხორციელება მიმდინარე წლის 18 სექტემბერს დაიწყო. საარჩევნო სისტემების განვითარების, რეფორმებისა და სწავლების ცენტრისა და სასჯელაღსრულებისა და პრობაციის სასწავლო ცენტრის წარმომადგენლებმა ტრენინგის მონაწილეებს გააცნეს პატიმრობისა და თავისუფლების აღკვეთის დაწესებულებებში საარჩევნო პროცესების ორგანიზების საკითხები, სააგიტაციო მასალების განთავსებისა და ხმის მიცემის უფლების მქონე პატიმრების ინფორმირების წესი, დეტალურად მიმოიხილეს პატიმრების მიერ ხმის მიცემის პროცედურები.

მონაწილეებს გადაეცათ საარჩევნო სისტემების განვითარების, რეფორმებისა და სწავლების ცენტრისა  და  სასჯელაღსრულებისა და პრობაციის სასწავლო ცენტრის მიერ  მომზადებული  დამხმარე სახელმძღვანელოები.

პატიმრების მიერ საარჩევნო უფლების სრულფასოვნად რეალიზებასთან დაკავშირებით მათი ინფორმირებულობის ამაღლების მიზნით მომზადდა შესაბამისი საინფორმაციო ხასიათის ბუკლეტები, რომლებიც გადაეცემათ სასჯელაღსრულების დაწესებულებების ადმინისტრაციებს მათი გავრცელების უზრუნველსაყოფად.