დღეს ცენტრალურ საარჩევნო კომისიაში (ცესკო) არსებული ეთნიკური უმცირესობების საკითხებზე მომუშავე მუდმივმოქმედი ჯგუფის შეხვედრა გაიმართა.

ცენტრალური საარჩევნო კომისიის თავმჯდომარე გიორგი კალანდარიშვილმა  და საარჩევნო სისტემების საერთაშორისო ფონდის (IFES) საქართველოს წარმომადგენლობის ხელმძღვანელმა ქეთი მაისურაძემ გახსნეს.

გიორგი კალანდარიშვილმა შეხვედრის მონაწილეებს მუნიციპალიტეტის ორგანოთა 2021 წლის 2 ოქტომბრის არჩევნებისთვის საარჩევნო ადმინისტრაციის მიერ  განხორციელებული და დაგეგმილი საქმიანობების შესახებ ინფორმაცია გააცნო. ეთნიკური უმცირესობების საკითხებზე მომუშავე მუდმივმოქმედი ჯგუფის ხელმძღვანელმა სოფიო სიჭინავამ ჯგუფის წევრებს პრეზენტაცია წარუდგინა და  ეთნიკური უმცირესობების წარმომადგენლებით კომპაქტურად დასახლებულ მაჟორიტარულ ოლქებში შექმნილი საარჩევნო უბნების, ამომრჩეველთა ერთიან სიაში რეგისტრირებული  ამომრჩევლების, საუბნო საარჩევნო კომისიების ტრენინგების სისტემის, ამომრჩევლებისთვის მისაწვდომი სერვისებისა და ინფორმირების კამპანიის შესახებ ისაუბრა.

ცესკოს თავმჯდომარის განცხადებით, საარჩევნო ადმინისტრაციის მიზანია საქართველოს ყველა მოქალაქეს თანაბრად ჰქონდეს საშუალება ჩაერთოს საარჩევნო პროცესში.

„ჩვენ შევხვდით ეთნიკური უმცირესობების წარმომადგენლებსა და ამ საკითხებზე მომუშავე არასამთავრობო ორგანიზაციებს. შეხვედრას ასევე ესწრებოდა სახალხო დამცველის წარმომადგენელიც. ვისაუბრეთ იმ საქმიანობებზე, რომელსაც ცენტრალური საარჩევნო კომისია 2 ოქტომბრის არჩევნებისთვის ახორციელებს იმისთვის, რომ ეთნიკური უმცირესობების ყველა წარმომადგენელს თანაბრად ჰქონდეს შესაძლებლობა არჩევნებში მონაწილეობისა და პროცესებში შესაბამისი ჩართულობის. ვთარგმნეთ ყველა საარჩევნო დოკუმენტაცია აზერბაიჯანულ და სომხურ ენებზე, იმედი მაქვს, სამომავლოდ ეთნიკური უმცირესობების წარმომადგენლები უფრო მეტად იქნებიან საარჩევნო კომისიებში წარმოდგენილი, რისი წინაპირობაც და ხელშეწყობაც საარჩევნო ადმინისტრაციის მხრიდან სრულად არსებობს“, - განაცხადა გიორგი კალანდარიშვილმა.

ცესკოში არსებული ეთნიკური უმცირესობების საკითხებზე მომუშავე მუდმივმოქმედი ჯგუფის შეხვედრა საარჩევნო სისტემების საერთაშორისო ფონდის (IFES) მხარდაჭერით გაიმართა.