2021 წლის 2 ოქტომბრის მუნიციპალიტეტის ორგანოთა არჩევნებისთვის N4 კრწანისის საარჩევნო ოლქში ზოგიერთი საარჩევნო პროცედურა საპილოტე პროექტის ფარგლებში ელექტრონული ტექნოლოგიების გამოყენებით განხორციელდება. აღნიშნულ საკითხებზე საუბნო საარჩევნო კომისიების წევრები სპეციალურ ტრენინგებს გაივლიან, სწავლების ცენტრის მიერ შემუშავებული კონცეფციის შესაბამისად.

სასწავლო პროგრამას საუბნო საარჩევნო კომისიებს სწავლების ცენტრის მიერ გადამზადებული ტრენერები, 2021 წლის 14-27 სექტემბრის პერიოდში, ჩაუტარებენ. ტრენერებთან სამუშაო შეხედრა 13 სექტემბერს გაიმართა, რომლის ფარგლებშიც ცესკოს წევრმა დიმიტრი ჯავახაძემ საპილოტე პროექტისთვის ცესკოს მიერ მიღებულ პროცედურულ სიახლეებზე ისაუბრა; სწავლების ცენტრის დირექტორმა ნათია ზაალიშვილმა კი მონაწილეებს მიაწოდა ინფორმაცია საუბნო საარჩევნო კომისიების წევრთა პროფესიული გადამზადების მიზნით შემუშავებული სასწავლო პროგრამის ძირითადი ასპექტებისა და სატრენინგო სისტემის შესახებ, რომლის მიხედვით გათვალისწინებულია საარჩევნო კომისიების ხელმძღვანელი პირების გადამზადება ორ ეტაპად, ხოლო კომისიების სრული შემადგენლობის ტრენინგს ერთი ეტაპი დაეთმობა.  

პრაქტიკულ სწავლებაზე დაფუძნებით კომისიების წევრები გაეცნობიან ხმის მთვლელი სპეციალური აპარატის ფუნქციონირების წესსა და კენჭისყრის დღეს განსახორციელებელ საქმიანობას. სატრენინგო პროცესში ასევე ჩაერთვებიან წარმომადგენლები კომპანია „სმარტმატიკიდან“, რომელიც N4 კრწანისის საარჩევნო ოლქში განსახორციელებელი საპილოტე პროექტისთვის უზრუნველყოფს საარჩევნო უბნების აღჭურვას ხმის დათვლის სპეციალური აპარატებით.

საუბნო საარჩევნო კომისიების წევრებს გადაეცემათ საპილოტე პროექტისთვის სწავლების ცენტრის მიერ შემუშავებული სახელმძღვანელო ინსტრუქცია. ამომრჩეველთა ინფორმირების მიზნებისთვის საარჩევნო უბნებზე განთავსდება ცესკოს და სწავლების ცენტრის მიერ შემუშავებული საინფორმაციო პოსტერები, რომელიც ტექნოლოგიების გამოყენებით კენჭისყრის პროცესის წარმართვას ასახავს.

ტრენინგები პანდემიასთან დაკავშირებული ყველა რეკომენდაციის დაცვით წარიმართება. გრაფიკი ხელმისაწვდომია ბმულზე. მასში ცვლილებების განხორციელების შემთხვევაში, ინფორმაცია აისახება დაუყოვნებლივ.