2021 წლის 2 ოქტომბრის მუნიციპალიტეტის ორგანოთა არჩევნებისთვის N4 კრწანისის საარჩევნო ოლქში ზოგიერთი საარჩევნო პროცედურა საპილოტე პროექტის ფარგლებში ელექტრონული ტექნოლოგიების გამოყენებით განხორციელდება. ოლქში შემავალი საარჩევნო უბნები ხმის დათვლის სპეციალური აპარატებით აღიჭურვება, რომლის მიწოდებას  კომპანია „სმარტმატიკი“ უზრუნველყოფს.

ტექნოლოგიების გამოყენებით კენჭისყრაში ამომრჩევლის მონაწილეობისა და ხმების დათვლის საკითხებზე N4 კრწანისის საოლქო საარჩევნო კომისიის წევრების ინფორმირების მიზნით, ცესკომ და სწავლების ცენტრმა საინფორმაციო შეხვედრა გამართა.

კომპანია „სმარტმატიკის“ წარმომადგენლის საჩვენებელი პრეზენტაციის ფარგლებში მონაწილეები გაეცნენ ხმის მთვლელი სპეციალური აპარატის ფუნქციონირების წესს, ასევე, საპილოტე პროექტისთვის გათვალისწინებულ პროცედურულ სიახლეებს.

მნიშვნელოვანია, რომ ამომრჩევლებისთვის შესაბამისი მომსახურების განხორციელების უზრუნველსაყოფად, ტექნოლოგიების გამოყენებით კენჭისყრის პროცედურების წარმართვის საკითხებზე N4 კრწანისის საარჩევნო ოლქში შემავალი საუბნო საარჩევნო კომისიების წევრები ასევე გაივლიან სპეციალურ გადამზადებას. ტრენინგები სწავლების ცენტრის მიერ შემუშავებული სასწავლო პროგრამით, 2021 წლის 14-27 სექტემბრის პერიოდში, ჩატარდება. გრაფიკები წინასწარ გასაჯაროვდება ვებ-გვერდზე.