სწავლების ცენტრმა, მუნიციპალიტეტის ორგანოთა 2021 წლის 2 ოქტომბრის არჩევნებისთვის, ცესკოს კონტაქტ ჰაბის ოპერატორების გადამზადების კურსის განხორციელება დაიწყო.

ღონისძიება საქართველოს ცენტრალური საარჩევნო კომისიის თავმჯდომარემ გიორგი კალანდარიშვილმა და სწავლების ცენტრის დირექტორმა ნათია ზაალიშვილმა გახსნეს. მათ ყურადღება გაამახვილეს კონტაქტ ჰაბის ეფექტიანი საქმიანობის მნიშვნელობაზე, რაც ორიენტირებულია დაინტერესებული პირებისთვის არჩევნებთან დაკავშირებულ საკითხებზე  დროულად ამომწურავი ინფორმაციის გაცემაზე.

ოპერატორების მიერ კვალიფიციური სერვისის განხორციელების ხელშეწყობის მიზნებისთვის, მიმდინარე წლის 9 აგვისტოს ჩატარებული ტრენინგების I ეტაპზე, მონაწილეები დეტალურად გაეცნენ არჩევნებში ჩართული მხარეების რეგისტრაციის წესსა და პროცედურებს:

• მუნიციპალიტეტის წარმომადგენლობითი ორგანოს - საკრებულოს წევრობის კანდიდატის, პარტიული სიებისა და მუნიციპალიტეტის მერობის კანდიდატის წარდგენა/რეგისტრაცია/რეგისტრაციის გაუქმება;
• საარჩევნო სუბიექტების (პარტიები/საინიციატივო ჯგუფები) წარმომადგენლების რეგისტრაცია;
• დამკვირვებელი ორგანიზაციებისა და დამკვირვებელების რეგისტრაცია;
• მედიის წარმომადგენელთა აკრედიტაცია.

ტრენინგების მომდევნო ეტაპის განხორციელება სექტემბრის თვეში იგეგმება.