ცესკოსა და სწავლების ცენტრთან თანამშრომლობით, ევროპის საბჭოს ოფისმა საქართველოში დისტანციური სამუშაო შეხვედრა გამართა თემაზე: „სიძულვილის ენასთან ბრძოლა და საარჩევნო პროცესები“.
ღონისძიება მისასალმებელი სიტყვით გახსნეს საქართველოს ცენტრალური საარჩევნო კომისიის თავმჯდომარემ თამარ ჟვანიამ, საქართველოში ევროპის საბჭოს ოფისის არჩევნების და სამოქალაქო საზოგადოების განყოფილების წარმომადგენელმა გიომ ლუაზომ.
ცესკოს, სწავლების ცენტრისა და აჭარის უმაღლესი საარჩევნო კომისიის (უსკო) წარმომადგენლები, ევროპის საბჭოს ექსპერტებთან ერთად, აქტიურად იყვნენ ჩართული ორდღიან დისკუსიაში. მონაწილეებმა განიხილეს ისეთი მნიშვნელოვანი საკითხები, როგორიცაა: სიძულვილის ენასთან დაკავშირებული ცნებები (დეფინიციები); ევროპის საბჭოს სამართლებრივი და პოლიტიკური ინსტრუმენტები; გამოწვევები და კარგი პრაქტიკა საარჩევნო ადმინისტრაციისთვის (სიძულვილის ენის პრევენცია და რეაგირება სიძულვილის ენის გამოყენების შემთხვევებზე); საარჩევნო კამპანიაში სიძულვილის ენის წინააღმდეგ ბრძოლის ევროპის საბჭოს წევრი სახელმწიფოების სტანდარტები და კარგი პრაქტიკა.
შეხვედრის ფარგლებში მონაწილეებმა იმსჯელეს საქართველოს საარჩევნო ადმინისტრაციის წინაშე მდგარ გამოწვევებზე და სიძულვილის ენისგან თავისუფალი საარჩევნო გარემოს უზრუნველყოფად, კომპეტენციის ფარგლებში, განსახორციელებელ მექანიზმებზე.
სამუშაო შეხვედრა, რომელიც 14-15 ივნისს გაიმართა, ევროპის საბჭოს პროექტის „საარჩევნო პრაქტიკისა და პროცესის გამჭვირვალობის, ინკლუზიურობისა და სანდოობის მხარდაჭერა საქართველოში“ ხელშეწყობით იყო ორგანიზებული.
