2020 წლის 6 თებერვალს გამოცხადებული საგრანტო კონკურსის ფარგლებში დაფინანსებული პროექტების განხორციელება დასრულდა

12.10.2020

2020 წლის 6 თებერვალს სწავლების ცენტრის მიერ გამოცხადებული საგრანტო კონკურსის ფარგლებში, საკონკურსო კომისიის გადაწყვეტილებით დაფინანსებულმა 30 ადგილობრივმა არასამთავრობო ორგანიზაციამ დაასრულა საგრანტო პროექტების განხორციელება და შემაჯამებელი პრეზენტაციები წარადგინა.

პოლიტიკური პარტიების საარჩევნო შესაძლებლობების განვითარების მიმართულებით დაფინანსებულმა 21 ადგილობრივმა არასამთავრობო ორგანიზაციამ საქართველოს რეგიონებში განახორციელა საინფორმაციო-სასწავლო პროგრამები, რომელიც მიზნად ისახავდა პოლიტიკური პარტიების ადამიანური რესურსის გაძლიერებას 2020 წლის საქართველოს პარლამენტის არჩევნებისთვის.

ადგილობრივი არასამთავრობო ორგანიზაციების მიერ შეთავაზებული საინფორმაციო-სასწავლო პროგრამების ფარგლებში მონაწილეები გაეცნენ შემდეგ საკითხებს:

არჩევნების საერთაშორისო სტანდარტები;
ძალადობისა და სიძულვილის ენისგან თავისუფალი საარჩევნო გარემო;
დეზინფორმაციის გავლენა სანდო საარჩევნო გარემოზე;
პარტიის როლი უსაფრთხო საარჩევნო გარემოს უზრუნველყოფაში;
ჩართული მხარეების საარჩევნო ეთიკა და პროფესიული სტანდარტები;
წინასაარჩევნო კამპანიის/აგიტაციის წარმოება და შეზღუდვები;
საარჩევნო პროცესში ადმინისტრაციული რესურსების გამოყენებასთან დაკავშირებული რეგულაციები.

აღსანიშნავია, რომ საგრანტო პროექტების განხორციელების პროცესში სწავლების ცენტრმა, კონტრიბუციის სახით, უზრუნველყო პოლიტიკური პარტიების წარმომადგენლების სწავლება შემდეგ მოდულებზე: საარჩევნო ადმინისტრაციის მუშაობის წესი; არჩევნების ორგანიზება (საარჩევნო ციკლი) და კენჭისყრის დღე; საჩივრის/განცხადების შედგენის საფუძველი და ტექნიკა.

საგრანტო პროექტები ქვეყნის მასშტაბით (თბილისი, კახეთი, ქვემო ქართლი, შიდა ქართლი, მცხეთა-მთიანეთი, სამცხე-ჯავახეთი, იმერეთი, რაჭა-ლეჩხუმი და ქვემო სვანეთი, სამეგრელო და ზემო სვანეთი, გურია და აჭარა), 2020 წლის 15 ივნისიდან - 14 სექტემბრის პერიოდში განხორციელდა.

ახალგაზრდა ამომრჩევლების საარჩევნო პროცესში ჩართულობის უზრუნველყოფის მიმართულებით დაფინანსებულმა 9 არასამთავრობო ორგანიზაციამ ახალგაზრდა ამომრჩევლებისთვის განახორციელა საინფორმაციო/სასწავლო პროგრამები, რომელიც მოიცავდა ბენეფიციარებისთვის (მათ შორის ეთნიკური უმცირესობების წარმომადგენლები, შშმ ახალგაზრდები, იძულებით გადაადგილებული პირები) ინფორმაციის მიწოდებას შემდეგ საკითხებზე:

სახელმწიფო მოწყობა და არჩევითი ორგანოების ფორმირების წესი საქართველოში;
აქტიური მოქალაქეობა და არჩევნების გზით ქვეყნის მართვის პროცესში მონაწილეობის მნიშვნელობა;
ანგარიშვალდებულება ელექტორატსა და მის მიერ არჩეულ ინსტიტუციებს შორის;
დემოკრატიული საარჩევნო პროცესის სახელმძღვანელო პრინციპები (მათ შორის, ხმის მიცემის ფარულობის პრინციპი);
ამომრჩევლის პერსონალური მონაცემების დაცვა საარჩევნო პროცესში;
საარჩევნო უფლებები და რეალიზება;
გენდერული თანასწორობა არჩევნებში;
ინკლუზიური საარჩევნო გარემო (მოწყვლადი ჯგუფების ჩართულობა საარჩევნო პროცესში);
არჩევნების პოპულარიზაციასა და სამოქალაქო პასუხისმგებლობის ზრდაზე მიმართული სხვა საკითხები.

მნიშვნელოვანია, რომ პროექტის ფარგლებში შეთავაზებული საინფორმაციო-სასწავლო პროგრამები, მეთოდოლოგია და სასწავლო მასალები შემუშავდა ახალგაზრდა ამომრჩევლების ასაკისა და ინტერესების შესაბამისად.

პროექტები 2020 წლის 15 ივნისიდან - 14 აგვისტოს პერიოდში განხორციელდა.

პირველი მიმართულების თემატიკა - პოლიტიკური პარტიების საარჩევნო შესაძლებლობების განვითარების ხელშეწყობა