ცესკომ და სწავლების ცენტრმა 2020 წლის 31 ოქტომბრის არჩევნებისთვის მედიის წარმომადგენლებთან საინფორმაციო შეხვედრა გამართეს.

შეხვედრის ფარგლებში სწავლების ცენტრისა და ცესკოს წარმომადგენლებმა მონაწილეებს გააცნეს საარჩევნო კანონმდებლობის სიახლეები და განიხილეს სხვადასხვა მნიშვნელოვანი საკითხები, მათ შორის:

• პანდემიის პირობებში არჩევნების ჩატარებასთან დაკავშირებული რეგულაციები;
• მედიის როლი და უფლებრივი მდგომარეობა კენჭისყრის პროცესში;
• კენჭისყრის დღეს კენჭისყრის შენობაში ფოტო/ვიდეო გადაღების რეგულაციები (მათ შორის, რეგულაციები ხმის მიცემის პროცესში ფარულობისა და კენჭისყრის პროცესის მიმდინარეობისას ამომრჩეველთა პერსონალური მონაცემების დაცვის უზრუნველსაყოფად);
• მედიის და სხვა ჩართული მხარეების როლი არჩევნების უსაფრთხოების უზრუნველსაყოფად.

შეხვედრის მონაწილეებს დეზინფორმაციისა და სიძულვილის ენასთან დაკავშირებული საკითხები  საარჩევნო სისტემების საერთაშორისო ფონდის (IFES) მოწვეულმა ექსპერტმა გააცნო.

საინფორმაციო შეხვედრა 2020 წლის 21 ოქტომბერს ჩატარდა და მასში მონაწილეობა სხვადასხვა მედია საშუალების 25-მა წარმომადგენელმა (მათ შორის ქალი - 20  და კაცი - 5) მიიღო.  შეხვედრას ასევე დაესწრნენ ეროვნული დემოკრატიული ინსტიტუტისა (NDI) და ეუთოს დემოკრატიული ინსტიტუტებისა და ადამიანის უფლებათა ოფისის (OSCE/ODIHR) გრძელვადიანი სადამკვირვებლო მისიის წარმომადგენლები.

ცესკომ და სწავლების ცენტრმა მედიის წარმომადგენლებთან საინფორმაციო შეხვედრა საარჩევნო სისტემების საერთაშორისო ფონდის (IFES) მხარდაჭერით განახორციელა.