სწავლების ცენტრმა საქართველოს პარლამენტის 2020 წლის 31 ოქტომბრის არჩევნებისთვის უზრუნველყო ცესკოს 2020 წლის 3 სექტემბრის N75/2020 განკარგულებით ავღანეთში ბაგრამისა და მაზარი-შარიფის საარჩევნო უბნებზე შექმნილი სპეციალური ჯგუფების წევრების პროფესიული გადამზადება.

აღნიშნული მიზნად ისახავს ავღანეთში განლაგებული საქართველოს შეიარაღებული ძალების სამშვიდობო ბატალიონებში მოსამსახურე საქართველოს მოქალაქეების საყოველთაო საარჩევნო უფლების რეალიზების ხელშეწყობას.

ტრენინგზე განხილულ იქნა შემდეგი ძირითადი სასწავლო მოდულები:

• საარჩევნო უბნის გახსნა და კენჭისყრის დაწყებამდე ჩასატარებელი პროცედურები;
• კენჭისყრის დღეს საუბნო საარჩევნო კომისიის წევრთა მიერ შესასრულებელი ფუნქციები;
• ამომრჩეველთა მიერ ხმის მიცემის წესი (მათ შორის, ნების თავისუფალი გამოვლენისა და ხმის მიცემის ფარულობის პრინციპი);
• ამომრჩეველთა პერსონალური მონაცემების დაცვის საკითხები;
• საარჩევნო უბნის დახურვა, საუბნო საარჩევნო კომისიის წევრთა ფუნქციები საარჩევნო ბიულეტენების დახარისხება/დათვლა/დალუქვის პროცესში;
• კენჭისყრის შედეგების შემაჯამებელი ოქმის შედგენა და საჯაროობა;
• კენჭისყრის დღის განცხადება/საჩივრები;
• პანდემიის პირობებში არჩევნების უსაფრთხო გარემოში ჩატარებასთან დაკავშირებული რეგულაციები.

ტრენინგი დისტანციურ ფორმატში ჩატარდა და მასში მონაწილეობა სპეციალური ჯგუფების 17 წევრმა მიიღო (მათ შორის  ქალი - 6, კაცი - 11).