2020 წლის 13 ივლისს სწავლების ცენტრის მიერ გამოცხადებული საგრანტო კონკურსის ფარგლებში, საკონკურსო კომისიის გადაწყვეტილებით დაფინანსდა 44 ადგილობრივი არასამთავრობო ორგანიზაცია, შემდეგ მიმართულებაზე: „ამომრჩეველთა ინფორმირება 2020 წლის საქართველოს პარლამენტის  არჩევნებისთვის“.

კონკურსის გამოცხადება მიზნად ისახავს ადგილობრივი არასამთავრობო სექტორის წახალისებას ისეთი პროექტების განსახორციელებლად, რომელიც ორიენტირებული იქნება 2020 წლის საქართველოს პარლამენტის არჩევნებისთვის ამომრჩეველთა საარჩევნო ცნობიერების ამაღლების, სამოქალაქო პასუხისმგებლობის ზრდისა და არჩევნებში ამომრჩევლის გააქტიურების ხელშეწყობის მიზნით შესაბამისი საინფორმაციო-სასწავლო ხასიათის პროგრამების, საინფორმაციო კამპანიების, გადაცემების ან/და სხვა ფორმატის ღონისძიებების განხორციელებაზე.

აღნიშნული საინფორმაციო-სასწავლო ხასიათის ღონისძიებები უზრუნველყოფს ელექტორატის ინფორმირებულობას არჩევნებთან დაკავშირებულ საკანონმდებლო ცვლილებებზე, პანდემიის პირობებში არჩევნების ჩატარების წესსა და საარჩევნო უბანზე ხმის მიცემის უსაფრთხო პროცედურების საკითხებზე, საარჩევნო უფლებებსა და მათი რეალიზების  პროცედურაზე (მათ შორის, ხმის მიცემის ფარულობის პრინციპთან დაკავშირებით), აგრეთვე, სხვა მნიშვნელოვან საარჩევნო საკითხებზე, რაც ხელს შეუწყობს ამომრჩევლის მიერ გააზრებული არჩევანის გაკეთებას და წაახალისებს ამომრჩევლების (მათ შორის ახალგაზრდა ამომრჩევლების) აქტივობის ზრდას საარჩევნო პროცესში.

თემატიკის მიზნიდან გამომდინარე, დაფინანსებული საგრანტო პროექტები განხორციელდება ქვეყნის მასშტაბით (თბილისი, კახეთი, ქვემო ქართლი, შიდა ქართლი, მცხეთა-მთიანეთი, სამცხე-ჯავახეთი, იმერეთი, რაჭა-ლეჩხუმი და ქვემო სვანეთი, სამეგრელო და ზემო სვანეთი, გურია და აჭარა) 2020 წლის 25 სექტემბრიდან - 25 ოქტომბრის პერიოდში. პროექტების ფარგლებში ჩასატარებელი ღონისძიებების გრაფიკი განთავსებულია პროექტების რუკაზე. გრაფიკი ასევე მოიცავს ინფორმაციას განხორციელებული ცვლილებების შესახებ.

საგრანტო საკონკურსო კომისიის გადაწყვეტილებით დაფინანსებული არასამთავრობო ორგანიზაციების შესახებ ინფორმაცია იხილეთ ბმულზე.