2020 წლის 31 ივლისს დასრულდა სასწავლო პროექტის „საარჩევნო ადმინისტრატორის კურსები - საუბნო საარჩევნო კომისიების პოტენციური წევრებისთვის“ განხორციელება.

სამოქალაქო საარჩევნო ცნობიერების ამაღლებასა და საარჩევნო ადმინისტრაციის კვალიფიციური პოტენციური საკადრო რესურსის გამოვლენა-განვითარებაზე ორიენტირებული პროფილური სასწავლო პროგრამის ფარგლებში მონაწილეები გაეცნენ კენჭისყრის დღის პროცედურებსა და საუბნო საარჩევნო კომისიის კომპეტენციას მიკუთვნებულ საკითხებს.

სასწავლო პროექტი 2020 წლის 16 ივლისიდან 31 ივლისის ჩათვლით პერიოდში, 64 მუნიციპალიტეტში განხორციელდა და მასში მონაწილეობა მიიღო 7104 მოქალაქემ, რომლებმაც შესაბამისი რეგისტრაცია გაიარეს საოლქო საარჩევნო კომისიებში.

სასწავლო კურსი სწავლების ცენტრის მიერ გადამზადებულმა საოლქო საარჩევნო კომისიების წევრებმა და საარჩევნო ადმინისტრაციის ტრენერებმა განხორციელეს (157 ტრენერი).

ცესკო და სწავლების ცენტრი აღნიშნულ სასწავლო პროექტს 2015 წლიდან ახორციელებს. დღემდე „საარჩევნო ადმინისტრატორის კურსები - საუბნო საარჩევნო კომისიების პოტენციური წევრებისთვის“ 27 251-მა მონაწილემ გაიარა.