საქართველოს ცენტრალურ საარჩევნო კომისიას (ცესკო) და საარჩევნო სისტემების განვითარების, რეფორმებისა და სწავლების ცენტრთან (სწავლების ცენტრი) თანამშრომლობით, საქართველოში ევროპის საბჭოს (CoE) ოფისმა უზრუნველყო ტრენერთა ტრენინგის ორგანიზება თემაზე - „საარჩევნო დავების განხილვა - ეროვნული და საერთაშორისო სტანდარტები“. ტრენინგები 2020 წლის 6-7 აგვისტოს პერიოდში ჩატარდა, რომელშიც  მონაწილეობა მიიღეს ცესკოს იურიდიული დეპარტამენტის, აუდიტის დეპარტამენტის და სწავლების ცენტრის თანამშრომლებმა.

ღონისძიება ცესკოს თავმჯდომარემ თამარ ჟვანიამ, საქართველოში ევროპის საბჭოს (CoE) ოფისის ხელმძღვანელის მოადგილემ ვაჰაგ მურადიანმა და საარჩევნო სისტემების საერთაშორისო ფონდის (IFES) საქართველოს წარმომადგენლობის ხელმძღვანელმა ქეთი მაისურაძემ გახსნეს.

ევროპის საბჭოს (CoE) ოფისის მიერ ექსპერტებად მოწვეულმა თბილისის სააპელაციო სასამართლოს მოსამართლეებმა, ნანა დარასელიამ და შოთა გეწაძემ, ტრენინგის მონაწილეებთან განიხილეს შემდეგი მნიშვნელოვანი საკითხები: საერთაშორისო სტანდარტები და პრინციპები დემოკრატიული არჩევნებისთვის; საქართველოს საარჩევნო კანონმდებლობის ცვლილებები; საარჩევნო ადმინისტრაციის და საერთო სასამართლოების პრაქტიკის მიმოხილვა; ადამიანის უფლებათა ევროპული სასამართლოს პრეცედენტული სამართალი საარჩევნო დავებზე. პროგრამაში ექსპერტად ჩართულმა საარჩევნო სისტემების საერთაშორისო ფონდის (IFES) ვიცე-პრეზიდენტმა ჩედ ვიკერმა კი მონაწილეებს გაუზიარა ამერიკის შეერთებული შტატების სასამართლო პრაქტიკა საარჩევნო დავებთან დაკავშირებით.

განხორციელებული სატრენინგო პროგრამის მიზანია საარჩევნო ადმინსტრაციის ინსტიტუციური გაძლიერების ხელშეწყობა. გადამზადებული ტრენერები მომდევნო ეტაპზე საარჩევნო დავებზე ტრენინგებს ჩაუტარებენ საოლქო საარჩევნო კომისიის წევრებს.

ღონისძიება ევროსაბჭოს პროექტის „საარჩევნო პრაქტიკისა და პროცესის გამჭვირვალობის, ინკლუზიურობისა და სანდოობის მხარდაჭერა საქართველოში“ ფარგლებში განხორციელდა.