ცენტრალური საარჩევნო კომისიის (ცესკო) და ცესკოს სწავლების ცენტრის წარმომადგენლებისთვის კიბერუსაფრთხოების, კერძოდ - კიბერ-ჰიგიენის საკითხებზე ტრენერთა ტრენინგი დისტანციურად, ონლაინ რეჟიმში მიმდინარეობს.
ტრენინგი ცესკოს თავმჯდომარე თამარ ჟვანიამ და საარჩევნო სისტემების საერთაშორისო ფონდის (IFES) პროექტის ხელმძღვანელმა ქეთი მაისურაძემ გახსნეს.
კურსი მოიცავს ისეთ მნიშვნელოვან საკითხებს, როგორიც არის: არჩევნები და კიბერუსაფრთხოება, კიბერ-ჰიგიენის გაიდლაინები; მონაწილეები ასევე განიხილავენ კიბერ-ჰიგიენის შიდა ორგანიზაციულ პოლიტიკებს. სწავლებას IFES-ის ექსპერტი, ნათია ქაშაკაშვილი უძღვება.
ტრენერთა ტრენინგის წარმატებით გავლის შემდეგ, მონაწილეები მომავალში უზრუნველყოფენ საარჩევნო ადმინისტრაციის წარმომადგენლებისთვის, ზემოაღნიშნულ საკითხებზე, ტრენინგების ჩატარებას.
ონლაინ კურსი, რომელიც საარჩევნო სისტემების საერთაშორისო ფონდის ორგანიზებით ხორციელდება, 22 აპრილს დაიწყო და 11 დღის განმავლობაში გაგრძელდება.
