საარჩევნო ადმინისტრაციამ პროექტისთვის „საარჩევნო განვითარების სკოლა“ ტრენერთა (ToT) მომზადება დაიწყო. ტრენინგის დაწყებამდე, მონაწილეებს ცესკოს თავმჯდომარე თამარ ჟვანია მიესალმა. „საარჩევნო განვითარების სკოლა”, რომელიც წელს პირველად ზამთარშიც გაიმართება, 17-დან 28 თებერვლის ჩათვლით ჩატარდება.

საოლქო საარჩევნო კომისიების წევრები და ცესკოს თანამშრომლები სწავლებას 10-13 თებერვლის ჩათვლით გადიან და შემდგომ „საარჩევნო განვითარების სკოლის“ სასწავლო კურსს წარუძღვებიან. საარჩევნო განვითარების სკოლები 8 ქალაქში - თბილისში, თელავში, რუსთავში, გორში, ახალციხეში, ქუთაისში, ზუგდიდსა და ბათუმში გაიხსნება. 18-დან 25 წლის ახალგაზრდები საარჩევნო საკითხებს შეისწავლიან.

ტრენერთა გადამზადებას საარჩევნო სისტემების განვითარების, რეფორმებისა და სწავლების ცენტრის წარმომადგენლები ახორციელებენ. კურსის გავლის შემდეგ, ტრენერები ახალგაზრდებს საარჩევნო განვითარების სკოლებში ისეთ მნიშვნელოვან საკითხებს შეასწავლიან, როგორებიცაა: საარჩევნო სისტემები, საარჩევნო ადმინისტრაცია, 1919 წლის დამფუძნებელი კრების არჩევნები, დემოკრატიული საარჩევნო პრინციპები, არჩევითი ორგანოები საქართველოში, არჩევნებში ჩართული მხარეები, არჩევნების გამჭვირვალობა და ხელმისაწვდომობა, გენდერული თანასწორობა და სხვა. „საარჩევნო განვითარების სკოლა“ მუდმივად ვითარდება და წელს სასწავლო კურსს შემდეგი საკითხები დაემატა: ხმის მიცემის ელექტრონული საშუალებები, არჩევნები და კვლევები, დეზინფორმაცია და ყალბი ცნობების გავრცელება საარჩევნო პერიოდში.

პროექტი საარჩევნო სისტემების საერთაშორისო ფონდის (IFES) მხარდაჭერით ხორციელდება და მიზნად ისახავს სამოქალაქო ჩართულობის ხელშეწყობასა და არჩევნების პოპულარიზაციას ახალგაზრდებში.