ცენტრალურ საარჩევნო კომისიაში (ცესკო) შეზღუდული შესაძლებლობების მქონე პირთა საკითხებზე მომუშავე ჯგუფის შეხვედრა გაიმართა. შეხვედრა ცესკოს თავმჯდომარე თამარ ჟვანიამ გახსნა. შეხვედრას როგორც სამუშაო ჯგუფის წევრი სწავლების ცენტრის დირექტორი ნათია ზაალიშვილიც ესწრებოდა.
საარჩევნო ადმინისტრაციის 2020-2023 წლების სტრატეგიული გეგმის პროექტის განხილვა დღევანდელი შეხვედრის მთავარ თემას წარმოადგენდა. 4 წლიანი სტრატეგიული გეგმის პროექტი ცესკოს პრეს-სპიკერმა და საარჩევნო ადმინიტრაციის სტრატეგიული დაგეგმარების გუნდის ხელმძღვანელმა ანა მიქელაძემ წარადგინა.
ცესკოს კოორდინაციის, დაგეგმვისა და ანგარიშგების დეპარტამენტის უფროსმა სოფიო სიჭინავამ ჯგუფის წევრებს დეტალური ინფორმაცია მიაწოდა საარჩევნო ადმინისტრაციის 2020 წლის სამოქმედო გეგმის პროექტისა და შშმ პირთა მიმართულებით გასათვალისწინებელ საქმიანობებზე. დღევანდელ შეხვედრაზე, შეზღუდული შესაძლებლობების მქონე პირთათვის მისაწვდომი საარჩევნო გარემოს ხელშეწყობის უზრუნველსაყოფად ერთობლივი სამომავლო საქმიანობებიც დაიგეგმა.
ვინაიდან საარჩევნო ადმინისტრაციისთვის მნიშვნელოვანია სამოქალაქო სექტორის ჩართულობა სტრატეგიული და სამოქმედო გეგმების შემუშავების პროცესში, ცესკო იმედოვნებს, რომ მათი მოსაზრებები ხელს შეუწყობს შემუშავებული გეგმების დახვეწას და წარმატებით განხორციელებას.
