საარჩევნო ადმინისტრაციამ ადგილობრივი არასამთავრობო და საერთაშორისო ორგანიზაციების წარმომადგენლებს საქართველოს საარჩევნო ადმინისტრაციის 2020-2023 წლების სტრატეგიული გეგმის პროექტი გააცნო.  გეგმა, რომელზეც საარჩევნო ადმინისტრაცია საარჩევნო სისტემების საერთაშორისო ფონდთან (IFES) მჭიდრო თანამშრომლობით მუშაობდა, შეხვედრის მონაწილეებს ცესკოს თავმჯდომარე თამარ ჟვანიამ წარუდგინა. მან, ადგილობრივი არასამთავრობო და საერთაშორისო ორგანიზაციების წარმომადგენლებს თავდაპირველად 2015-2019 წლის სტრატეგიული გეგმის ფარგლებში განხორციელებული საქმიანობა და მიღწეული შედეგები გააცნო, ასევე არსებულ გამოწვევებზე ისაუბრა.

შეხვედრის ძირითადი ნაწილი ახალ სტრატეგიულ გეგმას დაეთმო და ცესკოს თავმჯდომარემ მონაწილეებს დეტალური ინფორმაცია მიაწოდა როგორც სტრატეგიული გეგმის შემუშავების პროცესზე, ისე სტრატეგიული გეგმის  პრიორიტეტების, მიზნებისა და ამოცანების შესახებ.

საარჩევნო ადმინისტრაციის 2020-2023 წლების სტრატეგიული გეგმის სტრატეგიული პრიორიტეტები კი პროექტის მიხედვით შემდეგნაირად განისაზღვრება: 

• საარჩევნო კულტურა და განათლება;
• არჩევნების სანდოობა და უსაფრთხოება;
• საარჩევნო სერვისები და ტექნოლოგიები;
• ინკლუზიური საარჩევნო გარემო;
• მართვის ეფექტიანობა და ინსტიტუციური გაძლიერება.

ვინაიდან საარჩევნო ადმინისტრაციისთვის მნიშვნელოვანია სამოქალაქო სექტორის ჩართულობა სტრატეგიული გეგმის შემუშავების პროცესში, ცესკო იმედოვნებს, რომ მათი მოსაზრებები ხელს შეუწყობს შემუშავებული გეგმის დახვეწას და წარმატებით განხორციელებას.