ცესკოში პროექტის „საარჩევნო განვითარების სკოლა“ ტრენერებისთვის ტრენინგი (TOT) მიმდინარეობს. 3 დღიან სასწავლო კურსს საოლქო საარჩევნო კომისიის წევრები გადიან, რომლებიც შემდგომ სასწავლო პროგრამას განახორციელებენ.

საარჩევნო ადმინისტრაცია უკვე მეხუთე წელია ახორციელებს პროექტს „საარჩევნო განვითარების სკოლა“, რომლის ფარგლებშიც ახალგაზრდები საარჩევნო საკითხებზე 10 დღიან სასწავლო კურსს გადიან.

ტრენერები სწორედ ზემოაღნიშნული სწავლებისთვის ემზადებიან და ისეთ მნიშვნელოვან საკითხებზე გადიან გადამზადებას, როგორიცაა გენდერული თანასწორობა, სახელმწიფოს ინსტიტუციური მოწყობა, უშუალო დემოკრატიის ფორმები, რეფერენდუმი და პლებისციტი, არჩევნების საკანონმდებლო რეგულირება, ევროპის პარლამენტი, საარჩევნო ადმინისტრაციის მოდელები, არჩევნებში ჩართული მხარეები, არჩევნების ისტორია საქართველოში. ToT-ს ცესკოს სწავლების ცენტრის წარმომადგენლები უძღვებიან.

ტრენინგი ცესკოს მდივანმა გიორგი ჯავახიშვილმა გახსნა და მონაწილეებთან სასწავლო კურსის მნიშვნელობაზე ისაუბრა.

"საარჩევნო განვითარების სკოლა" წელს 15 ივლისიდან დაიწყება. 18-დან 24 წლამდე ახალგაზრდებს თბილისსა და 25 მუნიციპალიტეტში (გურჯაანში, სიღნაღში, თელავში, ახმეტაში, რუსთავში, გარდაბანში, მარნეულში, დუშეთში, ახალგორში (წეროვანი, დევნილთა დასახლება), გორში, ხაშურში, ბორჯომში, ახალციხეში, ამბროლაურში, საჩხერეში, ზესტაფონში, სამტრედიაში, ხონში, ქუთაისში, ოზურგეთში, სენაკში, ზუგდიდში, ფოთში, ბათუმსა და ქობულეთში) ჩაუტარდებათ სწავლება. პროექტი ემსახურება სამოქალაქო ჩართულობის გაზრდას და არჩევნების პოპულარიზაციას ახალგაზრდებში.

„საარჩევნო განვითარების სკოლა" ევროპის საბჭოს (CoE) და საარჩევნო სისტემების საერთაშორისო ფონდის (IFES) მხარდაჭერით ხორციელდება. ტრენერთა ტრენინგი 26 ივნისს დაიწყო და 28 ივნისს დასრულდება.