ცენტრალურ საარჩევნო კომისიას (ცესკო), სწავლების ცენტრის დირექტორს და ცესკოს სტრუქტურული ერთეულების ხელმძღვანელებს ევროსაბჭოს ექსპერტებმა კვლევის ანგარიში წარუდგინეს. შეხვედრაზე საარჩევნო ადმინისტრაციისათვის თანამონაწილეობრივი გენდერული აუდიტის (PGA) შესახებ იმსჯელეს.
შეხვედრა ევროპის საბჭოს ოფისის ხელმძღვანელმა საქართველოში კრისტიან ურსემ და ცესკოს თავმჯდომარე თამარ ჟვანიამ გახსნეს. მათ ევროსაბჭოს ექსპერტების კვლევის მნიშვნელობაზე ისაუბრეს.
შეხვედრის მონაწილეებმა განიხილეს თანამონაწილეობივი გენდერული აუდიტი, მისი მიზნები და ამოცანები, ასევე თანამონაწილეობრივი გენდერული აუდიტი საქართველოს საარჩევნო ადმინისტრაციისთვის, დასკვნები და რეკომენდაციები. ცესკოს გენდერული თანასწორობის საბჭოს თავმჯდომარე ზურაბ ხრიკაძემ წარადგინა პრეზენტაცია და ისაუბრა ცესკოს პოლიტიკის შესახებ გენდერულ თანასწორობასთან, პროგრესთან და გამოწვევებთან დაკავშირებით.
სამუშაო შეხვედრა ასევე მოიცავდა თანამონაწილეობრივი გენდერული აუდიტის მეთოდოლოგიის განხილვას, ასევე საქართველოს საარჩევნო ადმინისტრაციის გენდერული თანასწორობის სამოქმედო გეგმის შესახებ მსჯელობას.
შეხვედრას ევროპის საბჭოს საარჩევნო მხარდაჭერის განყოფილების ხელმძღვანელის მოადგილე, გენადი კოსიაკი უძღვებოდა. სამუშაო შეხვედრის ფარგლებში, ევროსაბჭოს ექსპერტების კვლევა თანამონაწილეობრივი გენდერული აუდიტის ILO-ს მიერ სერტიფიცირებულმა ფასილიტატორებმა ნინო ლილუაშვილმა და დაკო ბახტურიძემ წარადგინეს.
გენდერული აუდიტი ჩატარდა შრომის საერთაშორისო ორგანიზაციის მიერ შემუშავებული მეთოდოლოგიის საფუძველზე, რაც მოიცავდა საერთაშორისო და ადგილობრივი კანონმდებლობისა და საარჩევნო ადმინისტრაციის დოკუმენტების ანალიზს, ინტერვიუებს თანამშრომლებთან და თანამონაწილეობით შიდაუწყებრივ სემინარს.
