ცენტრალურ საარჩევნო კომისიაში (ცესკო) შეზღუდული შესაძლებლობების მქონე პირთა საკითხებზე მომუშავე მუდმივმოქმედი ჯგუფის წევრებთან შეხვედრა გაიმართა. შეხვედრა ცესკოს თავმჯდომარე თამარ ჟვანიამ გახსნა. ცესკოს თავმჯდომარემ ჯგუფის წევრებს ინფორმაცია მიაწოდა დაგეგმილი შუალედური და რიგგარეშე არჩევნების შესახებ.
დღევანდელი შეხვედრის ძირითადი საკითხი ცესკოს მიერ მომზადებული შესაძლო საკანონმდებლო ცვლილების პროექტის განხილვა იყო. პროექტი, რომელიც მობილობის შეზღუდვის მქონე (ეტლით მოსარგებლე) პირების მიერ, რეგისტრაციის შესაბამისად, საარჩევნო ოლქის ტერიტორიაზე ადაპტირებული საარჩევნო უბნის არჩევის შესაძლებლობას შეეხება, შეხვედრის მონაწილეებს დეტალურად გააცნო სამუშაო ჯგუფის ხელმძღვანელმა და ცესკოს კოორდინაციის, დაგეგმვისა და ანგარიშგების დეპარტამენტის უფროსმა სოფიო სიჭინავამ. ჯგუფის წევრებმა საკუთარი რეკომენდაციები წარმოადგინეს, რომელთა გათვალისწინებით შემუშავებული შესაძლო საკანონმდებლო ცვლილების პროექტი ჩართული მხარეებისთვისაც იქნება ხელმისაწვდომი.
