სწავლების ცენტრმა, პარტნიორ უნივერსიტეტებთან გაფორმებული ურთირთთანამშრომლობის მემორანდუმის ფარგლებში, 2018-2019 სასწავლო წლის შემოდგომის სემესტრში 7 უმაღლეს სასწავლებელში საარჩევნო სამართლის საავტორო პროგრამა განახორციელა.

სემესტრული სწავლება ივანე ჯავახიშვილის სახელობის თბილისის სახელმწიფო უნივერსიტეტის, ილიას სახელმწიფო უნივერსიტეტის, დავით აღმაშენებლის სახელობის უნივერსიტეტის, აღმოსავლეთ ევროპის უნივერსიტეტის, თბილისის ღია სასწავლო უნივერსიტეტის, გორის სახელმწიფო სასწავლო უნივერსიტეტისა და სამცხე-ჯავახეთის სახელმწიფო უნივერსიტეტის 295 სტუდენტმა გაიარა (ქალი - 189; კაცი - 106). პროგრამის ფარგლებში იურიდიული ფაკულტეტის, პოლიტიკური და სოციალური მეცნიერებების ფაკულტეტის, ჟურნალისტიკის ფაკულტეტის საბაკალავრო პროგრამის სტუდენტები არჩევნებთან დაკავშირებით დეტალურად გაეცნენ შიდასახელმწიფოებრივ რეგულაციებს და განიხილეს საერთაშორისო საარჩევნო პრაქტიკა. აკრედიტებული საგანმანათლებლო პროგრამის დასასრულს, 2019 წლის 31 იანვრის ჩათვლით, სტუდენტებმა ფინალური გამოცდები ჩააბარეს.

აღსანიშნავია, რომ პროგრამის ფარგლებში იურიდიული ფაკულტეტის სტუდენტების მონაწილეობით ხუთ უნივერსიტეტში გაიმართა მოდელირებული სასამართლო პროცესები. აღნიშნული კომპონენტი წარმოადგენს სიახლეს სასწავლო ბადეში, რაც პროფესიული ცოდნის გაღრმავებასთან ერთად პრაქტიკული უნარ-ჩვევების განვითარების ხელშეწყობას ისახავს მიზნად.

საარჩევნო სამართლის სასწავლო პროგრამის მორიგი ეტაპი 2018-2019 წლის გაზაფხულის სემესტრში მარტის თვიდან დაიწყება. 2010 წლიდან დღემდე აღნიშნული პროგრამა 4 998 სტუდენტმა გაიარა.