ცენტრალურ საარჩევნო კომისიაში (ცესკო) ეთნიკური უმცირესობების საკითხებზე მომუშავე მუდმივმოქმედი ჯგუფის შეხვედრა გაიმართა. შეხვედრა ცესკოს თავმჯდომარე თამარ ჟვანიამ გახსნა, რომელმაც საარჩევნო პროცესში  ეთნიკური უმცირესობების ჩართულობის ზრდის მიზნით 2018 წელს ცესკოს მიერ განხორციელებულ აქტივობებზე ისაუბრა. თამარ ჟვანიას განცხადებით ამ მიმართულებით საარჩევნო ადმინისტრაცია გამოწვევების წინაშეც დგას, რომელთა გადაჭრაც არასამთავრობო სექტორთან თანამშრომლობით, მათი რეკომენდაციების გათვალისწინებით, კიდევ უფრო ეფექტური იქნება.

ენობრივ ბარიერზე, ეთნიკური უმცირესობების წარმომადგენელ ქალთა ჩართულობაზე საარჩევნო პროცესში, მათ ინფორმირებულობაზე ყურადღება გაამახვილა ცესკოს კოორდინაციის, დაგეგმვისა და ანგარიშგების დეპარტამენტის უფროსმა სოფიო სიჭინავამ. შეხვედრაზე მხარეები შეთანხმდნენ, რომ ამ პროცესში უმთავრესი ამომრჩევლის ინფორმირება და  საგანმანათლებლო პროექტების განხორციელებაა.

შეხვედრის მონაწილეებმა ცესკოს ინიციატივები და განხორციელებული აქტივობები დადებითად შეაფასეს, რის შემდეგაც ცესკოს ხელმძღვანელ პირებს დღეს საკუთარი მოსაზრებები გააცნეს. აღნიშნულ რეკომენდაციებს ცესკოს წევრები 2019 წლის სამოქმედო გეგმის შემუშავებისას განიხილავენ. ცესკოს თავმჯდომარის განცხადებით, 2019 წელი საარჩევნო ადმინისტრაციამ სწორედ რეკომენდაციების გათვალისწინების, გამოწვევების გადაჭრის და საარჩევნო გარემოს გაუმჯობესებისთვის უნდა გამოიყენოს.

18 დეკემბერს გამართულ შეხვედრას ცესკოსა და ცესკოს სწავლების ცენტრის ხელმძღვანელი პირები, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის, საერთაშორისო და ადგილობრივი არასამთავრობო ორგანიზაციების წარმომადგენლები ესწრებოდნენ.