საქართველოს პრეზიდენტის 2018 წლის 28 ოქტომბრის არჩევნებისთვის სწავლების ცენტრის მიერ შემუშავებული ტრენინგების კონცეფციის შესაბამისად, 18 ოქტომბრიდან იწყება IV ეტაპის ტრენინგები, რომელიც დაეთმობა საუბნო საარჩევნო კომისიების სრული შემადგენლობის სწავლებას.

ტრენინგების ფარგლებში საუბნო კომისიების წევრები პრაქტიკულად განახორციელებენ კენჭისყრის დღის ეპიზოდურ ინსცენირებას (ეპიზოდური ინსცენირება ითვალისწინებს კენჭისყრის დღის დილის 07:00 საათიდან - 08:00 საათამდე ჩასატარებელი პროცედურების, კენჭისყრის შენობის დახურვის/ხმის დათვლის პროცედურებისა და კენჭისყრის შედეგების შემაჯამებელი ოქმის შედგენის პრაქტიკული სავარჯიშოს შესრულებას).

ტრენინგის მონაწილეები ასევე, გაეცნობიან ისეთ მნიშვნელოვან საკითხებს, როგორიცაა: კენჭისყრის დღეს ფოტოვიდეოგადაღების რეგულაციები და არჩევნების უსაფრთხოება.

ტრენინგების IV ეტაპი დასრულდება 23 ოქტომბერს.  ტრენინგების გრაფიკები იხილეთ ბმულზე.