საქართველოს პრეზიდენტის არჩევნებისთვის ამომრჩეველთა ინფორმირებისა და აქტიური მონაწილეობის წახალისების ხელშეწობის მიზნით, გრძელდება საინფორმაციო კამპანია „ვესაუბრებით ამომრჩევლებს“, რომლის ფარგლებშიც 14 ოქტომბერს, ცესკოს და სწავლების ცენტრის თანამშრომლებმა მცხეთაში ჩაატარეს საინფორმაციო ხასიათის აქცია „საარჩევნო ქოლგები“.
სვეტიცხოვლობის დღესასწაულზე ქუჩაში გამოსულ მოქალაქეებს მიეწოდათ ინფორმაცია საარჩევნო ადმინისტრაციის მიერ ამომრჩევლებისთვის შეთავაზებული საარჩევნო სერვისების შესახებ და დაურიგდათ ხმის მიცემის პროცედურების ამსახველი ბუკლეტები.
აღნიშნული ღონისძიების ფარგლებში, სიმბოლური „საარჩევნო ქოლგის“ ქვეშ ბევრი ამომრჩეველი გაერთიანდა, მათ 28 ოქტომბერს გასამართ საქართველოს პრეზიდენტის არჩევნებში აქტიური მონაწილეობის მზადყოფნა დააფიქსირეს და ნების გამოსახატად საარჩევნო ყუთში მწვანე ბარათები მოათავსეს წარწერით - მე აქტიური ამომრჩეველი ვარ.
