ცესკო და სწავლების ცენტრი 2018 წლის 4-19 ივნისის პერიოდში, საოლქო საარჩევნო კომისიების ხელმძღვანელი პირებისთვის ატარებს განახლებულ სასწავლო კურსს „სამართლებრივი წერა და საარჩევნო დავებთან დაკავშირებული ადმინისტრაციულ წარმოება“.

ღონისძიება ცესკოსა და სწავლების ცენტრის ხელმძღვანელმა პირებმა გახსნეს. ცესკოს თავმჯდომარის მოადგილემ  გიორგი შარაბიძემ და ცესკოს მდივანმა გიორგი ჯავახიშვილმა მონაწილეებს მიაწოდეს ინფორმაცია  სასწავლო კურსის შესახებ და ყურადღება გაამახვილეს სასწავლო მოდულების მნიშვნელობაზე. შეხვედრას ასევე ესწრებოდა საარჩევნო სისტემების საერთაშორისო ფონდის (IFES) პროექტის ხელმძღვანელი.

სწავლების ცენტრის დირექტორის მოადგილემ ნინო ბერულავამ მონაწილეებს დეტალურად გააცნო სწავლების ცენტრის ინიციატივა, რომელიც ითვალისწინებს საოლქო საარჩევნო კომისიების ხელმძღვანელი პირებისთვის, სასწავლო პროგრამის ფარგლებში ახალი მოდულის შეთავაზებას ემოციების, რთული საუბრებისა და კონფლიქტური სიტუაციების მართვის შესახებ.

სწავლებას ცესკოს იურიდიული დეპარტამენტის, სწავლების ცენტრის თანამშრომლები და მოწვეული ექსპერტები, ტარიელ სიხარულიძე, მაია ჯორჯიკია და დავით ღონღაძე უძღვებიან.

ტრენინგები ტარდება კომბინირებული მეთოდით, რომელიც მოიცავს ელექტრონულ და პრაქტიკულ სწავლებას (მათ შორის პრაქტიკული სავარჯიშოები და როლური თამაშების ჩატარებას) და ითვალისწინებს ისეთ საკითხებს, როგორიცაა:

• სამართლებრივი წერა;
• ადმინისტრაციული წარმოების ზოგადი მიმოხილვა;
• განცხადების/საჩივრის განხილვა და გადაწყვეტილების მიღება.
• გადაწყვეტილების მომზადება ადმინისტრაციულ სამართალდარღვევებთან დაკავშირებით;
• ემოციების, რთული საუბრებისა და კონფლიქტური სიტუაციების მართვა.

სასწავლო კურსი 10 ჯგუფს (230 მონაწილე) ეტაპობრივად ჩაუტარდება. ჯგუფების შემადგენლობაში არიან, როგორც საოლქო საარჩევნო კომისიების თავმჯდომარეები, თავმჯდომარის მოადგილეები და მდივნები, ისე ცესკოს რეგიონული კოორდინატორები.

ტრენინგები საარჩევნო სისტემების საერთაშორისო ფონდის (IFES) ჩართულობითა და ფინანსური მხარდაჭერით ხორციელდება.