საქართველოს პარლამენტის ინიციატივით, დღეს, საქართველოს პარლამენტის აპარატს, საარჩევნო სისტემების განვითარების, რეფორმებისა და სწავლების ცენტრსა და სახელმწიფო უწყების ათ საგანმანათლებლო დაწესებულებას შორის ურთიერთთანამშრომლობის მემორანდუმი გაფორმდა.
მემორანდუმის მიზანია მხარეთა საერთო ინტერესების სფეროში შემავალ აქტუალურ საკითხებზე თანამშრომლობა ერთობლივი სასწავლო - საგანმანათლებლო პროექტების განხორციელების, რესურსების გაზიარებისა და მაღალი კომპეტენციის მქონე კადრების მომზადების ხელშეწყობის გზით.
საქართველოს პარლამენტის აპარატის უფროსმა ღონისძიების სტუმრებს სიტყვით მიმართა და მემორანდუმის მნიშვნელობაზე ისაუბრა. მისი განცხადებით, მემორანდუმი თავისი ფორმითა და შინაარსით უპრეცედენტოა და ხელს შეუწყობს იმ სტანდარტების დანერგვას, რაც სასიცოცხლოდ საჭიროა სახელმწიფო სტრუქტურების ყოველდღიური საქმიანობის განხორციელებასა და პროფესიონალური დონის ამაღლებისთვის. „დღევანდელი მემორანდუმის გაფორმებით ჩვენ ვიწყებთ ურთიერთობების ახალ ეტაპს და მე მიხარია, რომ წარმოდგენილი საგანმანათლებლო დაწესებულებები არა მხოლოდ პარლამენტთან, არამედ ერთმანეთთანაც დაიწყებენ მჭიდრო კომუნიკაციას და ვფიქრობ, რომ ეს ყველაფერი არა მხოლოდ პარლამენტის, არამედ ჩვენი ქვეყნის სასიკეთო მომავალს წაადგება“, - განაცხადა გივი მიქანაძემ.
ღონისძიების სტუმრებს საქართველოს პარლამენტის სასწავლო ცენტრის საქმიანობისა და განვითარების შესახებ პრეზენტაცია სასწავლო ცენტრის ხელმძღვანელმა, თათა ომიაძემ წარუდგინა. მემორანდუმის გაფორმების შემდეგ სტუმრებმა სასწავლო ცენტრი დაათვალიერეს და მისი მუშაობის სპეციფიკას ადგილზე გაეცნენ.
ურთიერთთანამშრომლობის მემორანდუმს ხელი საარჩევნო სისტემების განვითარების, რეფორმებისა და სწავლების ცენტრის, საქართველოს სახალხო დამცველის აპარატის, საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის, საქართველოს შინაგან საქმეთა სამინისტროს აკადემიის, დავით აღმაშენებლის სახელობის საქართველოს ეროვნული თავდაცვის აკადემიის, სასჯელაღსრულებისა და პრობაციის სასწავლო ცენტრის, საქართველოს იუსტიციის სასწავლო ცენტრის, ფინანსთა სამინისტროს აკადემიის, ზურაბ ჟვანიას სახელობის სახელმწიფო ადმინისტრირების სკოლისა და საქართველოს სოფლის მეურნეობის მეცნიერებათა აკადემიის წარმომადგენლებმა მოაწერეს.
