სწავლების ცენტრი „საარჩევნო ადმინისტრატორის სასწავლო კურსების“ უზრუნველყოფის მიზნით, 2018 წლის 23 აპრილიდან 10 მაისის პერიოდში, რეგიონებში მართავს სამუშაო შეხვედრებს ტრენერებთან, რომლის ფარგლებში განიხილება სასწავლო პროექტის კონცეფცია და მონაწილეებს მიეწოდებათ პროგრამის განხორციელების ინსტრუქტაჟი (გრაფიკი).

პროფესიულად გადამზადებული 87 ტრენერი, 2018 წლის 14 მაისიდან 2 ივნისამდე პერიოდში, სასწავლო პროექტს საქართველოს მასშტაბით ყველა მუნიციპალიტეტში განახორციელებს.

სწავლების ცენტრის მიერ შემუშავებული „საარჩევნო ადმინისტრატორის სასწავლო კურსები“ ითვალისწინებს მოქალაქეთა პროფილურ სწავლებას. სამ დღიანი სასწავლო პროგრამა დაეთმობა კენჭისყრის დღის პროცედურებისა და საუბნო საარჩევნო კომისიის კომპეტენციას მიკუთვნებული საკითხების შესწავლას და მიზნად ისახავს საარჩევნო ადმინისტრაციის კვალიფიციური საკადრო რესურსის ფორმირების ხელშეწყობას. 

სასწავლო კურსის გავლა შეუძლია საქართველოს მოქალაქეს 18 წლის ასაკიდან. პროექტში მონაწილეობის მსურველთა რეგისტრაცია 20 აპრილს დასრულდა.