ცესკო და სწავლების ცენტრი 2018 წლის 19 მარტიდან იწყებს საინფორმაციო-სასწავლო კურსს „არჩევნები და ახალგაზრდა ამომრჩეველი“ საჯარო სკოლების XI-XII კლასის მოსწავლეებისათვის. პროგრამა ხუთ თვითმმართველ ქალაქში  (თბილისი, ქუთაისი, ფოთი, ბათუმი, რუსთავი) განლაგებულ 108 საჯარო სკოლაში განხორციელდება.

პროექტი მიზნად ისახავს ახალგაზრდების საარჩევნო ცნობიერების ამაღლებას და სამოქალაქო პასუხისმგებლობის ზრდის ხელშეწყობას. სასწავლო პროგრამაში გამოყენებული პრაქტიკული სწავლების ფორმატში საჯარო სკოლების მოსწავლეები ისეთ მნიშვნელოვან საკითხებს შეისწავლიან, როგორიცაა: არჩევნების ისტორიული ექსკურსი და თანამედროვეობა, არჩევნები და დემოკრატია, საარჩევნო ადმინისტრაცია და ამომრჩეველი, არჩევნებში ჩართული სხვა მხარეები. კურსის ბოლოს მოსწავლეები იმიტირებულ არჩევნებს ჩაატარებენ, რომლის პირობებშიც გამოვლინდება თავად მოსწავლეების მიერ გარემოს დაცვასთან დაკავშირებული საკითხების პოპულარიზაციის მიმართულებით შემუშავებული სლოგანებიდან გამარჯვებული სლოგანი.

სასწავლო პროექტის განხორციელებას სწავლების ცენტრის მიერ გადამზადებული საოლქო საარჩევნო კომისიების წევრები უზრუნველყოფენ, რომლებმაც შესაბამისი ტრენინგის ინსტრუქტაჟი, 1-5 მარტის პერიოდში, რეგიონებში გამართული სამუშაო შეხვედრების ფარგლებში გაიარეს.  

ცესკო და სწავლების ცენტრი აღნიშნულ პროექტს საქართველოს განათლებისა და მეცნიერების სამინისტროსთან თანამშრომლობით 2015 წლიდან ახორციელებს.

სწავლების ცენტრის მიერ შემუშავებული საინფორმაციო-სასწავლო კურსის „არჩევნები და ახალგაზრდა ამომრჩეველი“ კონცეფცია იხილეთ ბმულზე.

სასწავლო კურსი 19 მარტიდან 25 აპრილის პერიოდში ეტაპობრივად განხორციელდება (I ეტაპი: 19-23.03.18; II ეტაპი: 26-30.03.18; III ეტაპი: 11-17.04.18; IV ეტაპი: 19-25.04.18). ჩატარების გრაფიკები გასაჯაროვდება სწავლების ცენტრის ვებ-გვერდზე. იხილეთ I ეტაპის გრაფიკი.