16 თებერვალს, ცენტრალურ საარჩევნო კომისიაში (ცესკო) არსებული შეზღუდული შესაძლებლობის მქონე პირთა საკითხებზე მომუშავე სამუშაო ჯგუფის შეხვედრა გაიმართა. შეხვედრის მონაწილეებს ცესკოს თავმჯდომარის მოადგილე გიორგი შარაბიძე მიესალმა. მან ჯგუფის წევრებთან საარჩევნო ადმინისტრაციის მიერ დაგეგმილ საქმიანობებზე და 2018 წლის არჩევნების მზადების პროცესზე ისაუბრა. სწავლების ცენტრის დირექტორმა, ნათია ზაალიშვილმა სამუშაო ჯგუფის წევრებს განხორციელებული საგანმანათლებლო პროექტებისა და საგრანტო კონკურსის შესახებ მიაწოდა ინფორმაცია. სამუშაო ჯგუფის ხელმძღვანელმა და ცესკოს კოორდინაციის, დაგეგმვისა და ანგარიშგების დეპარტამენტის უფროსმა სოფიო სიჭინავამ მონაწილეებს 2017 წელს საარჩევნო ადმინისტრაციის მიერ შშმ პირთათვის საარჩევნო პროცესში ჩართულობის მხრივ განხორციელებული საქმიანობები გააცნო. კერძოდ, ყურადღება გამახვილდა ადაპტირებულ საარჩევნო უბნებზე, კენჭისყრის დღეს შშმ პირთა ხელმისაწვდომ სერვისებზე, არჩევნებში მონაწილე შშმ პირთა ამომრჩეველთა სტატისტიკაზე და ადმინისტრაციის 2018 წლის სამოქმედო გეგმით გათვალისწინებულ სერვისებზე.

სამუშაო ჯგუფი ცესკოში 2012 წლიდან მუშაობს და მისი მიზანი შეზღუდული შესაძლებლობის მქონე ამომრჩევლებისთვის თანაბარი საარჩევნო გარემოს შექმნაა. დღევანდელ შეხვედრას ცესკოს წევრი დიმიტრი ჯავახაძე, ცესკოს სწავლების ცენტრის დირექტორი, საოლქო საარჩევნო კომისიების თავმჯდომარეები, საარჩევნო სისტემების საერთაშორისო ფონდის (IFES) წარმომადგენელი, რეგიონული განვითარების და ინფრასტრუქტურის სამინისტროს, სახალხო დამცველის ოფისისა და არასამთავრობო ორგანიზაციების წარმომადგენლები ესწრებოდნენ.