8 თებერვალს, ცესკოს ეთნიკური უმცირესობების საკითხებზე მომუშავე მუდმივმოქმედი ჯგუფის შეხვედრა გაიმართა. ცენტრალური საარჩევნო კომისიის თავმჯდომარე თამარ ჟვანიამ ჯგუფის წევრებთან საუბრისას 2018 წლის არჩევნებისთვის მზადების პროცესზე გაამახვილა ყურადღება. სამომავლო გეგმებსა და პრიორიტეტებზე ისაუბრა ასევე ცესკოს თავმჯდომარის მოადგილე გიორგი შარაბიძემ. სწავლების ცენტრის ხელმძღვანელმა, ნათია ზაალიშვილმა მონაწილეებს დეტალურად გააცნო ინფორმაცია მიმდინარე საგრანტო კონკურსის თაობაზე, რომლის ძირითადი მიმართულებებია ახალგაზრდა ამომრჩეველი და სამოქალაქო აქტიურობა საზოგადოებრივ - პოლიტიკურ (საარჩევნო) პროცესში და პოლიტიკური პარტიების საარჩევნო შესაძლებლობების განვითარების ხელშეწყობა. შეხვედრაზე, ასევე ისაუბრეს საგანმანათლებლო პროგრამებზე, ეთნიკური უმცირესობების წარმომადგენელ ამომრჩეველთა ინფორმირებაზე  და 2018 წლის სამოქმედო გეგმაზე. სამუშაო ჯგუფის ხელმძღვანელმა სოფიო სიჭინავამ შეხვედრის მონაწილეებს დეტალური ინფორმაცია მიაწოდა იმ აქტივობების შესახებ, რომელიც საარჩევნო ადმინისტრაციამ 2017 წლის ადგილობრივი თვითმმართველობის არჩევნებში ეთნიკური უმცირესობების ჩართულობის ზრდისა და მათი ინფორმირებულობისთვის განახორციელა. შეხვედრის მონაწილეებმა ცესკოს ინიციატივები და განხორციელებული აქტივობები დადებითად შეაფასეს, რის შემდეგაც საკუთარი მოსაზრებებიც წარადგინეს.

8 თებერვალს გამართულ შეხვედრას ჯგუფის წევრებთან ერთად ცესკოს, ცესკოს სწავლების ცენტრის, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის, საერთაშორისო და ადგილობრივი ორგანიზაციების წარმომადგენლები ესწრებოდნენ.