სსიპ საარჩევნო სისტემების განვითარების, რეფორმებისა და სწავლების ცენტრი (შემდგომში - სწავლების ცენტრი) 2018 წლის 8 თებერვლიდან აცხადებს საგრანტო კონკურსს საქართველოს ცენტრალური საარჩევნო კომისიის 2018 წლის 22 იანვრის №9/2018 განკარგულებით განსაზღვრულ საგრანტო კონკურსის დაფინანსების შემდეგ მიმართულებებზე: 

• პირველი მიმართულება: ახალგაზრდა ამომრჩეველი და სამოქალაქო აქტიურობა საზოგადოებრივ - პოლიტიკურ (საარჩევნო) პროცესში
• მეორე მიმართულება: პოლიტიკური პარტიების საარჩევნო შესაძლებლობების განვითარების ხელშეწყობა

პირველი მიმართულების საკონკურსო თემატიკა:  ახალგაზრდა ამომრჩეველი და სამოქალაქო აქტიურობა საზოგადოებრივ - პოლიტიკურ (საარჩევნო) პროცესში

2015-2019 წლების სტრატეგიული გეგმის შესაბამისად საქართველოს საარჩევნო ადმინისტრაციის  საქმიანობის ერთ-ერთ პრიორიტეტად განსაზღვრულია სამოქალაქო და ამომრჩევლის განათლება საარჩევნო პროცესებში სამოქალაქო ჩართულობის დონის ამაღლების, აქტივობის ზრდისა და ამომრჩეველთა მიერ ინფორმირებული არჩევანის გაკეთების ხელშეწყობის მიზნით. ამომრჩეველთა დემოკრატიული ცნობიერების ამაღლების კუთხით განსაკუთრებულ მნიშვნელობას იძენს ახალი თაობის სამოქალაქო განათლებისა და მათი გააქტიურების ხელშეწყობა საზოგადოებრივ - პოლიტიკურ (საარჩევნო) პროცესში, რაც, თავის მხრივ, სახელმწიფო მმართველობაში მათ თანამონაწილეობას უზრუნველყოფს. აღსანიშნავია, რომ 2017 წლის დეკემბერს ჩატარებული კვლევის შედეგების მიხედვით ეროვნულ-დემოკრატიული ინსტიტუტისა (NDI) და კავკასიის კვლევითი რესურსების ცენტრის (CRRC) ანგარიშში აისახა 2017 წლის 21 ოქტომბრის ადგილობრივი თვითმმართველობის არჩევნებში ახალგაზრდების დაბალი აქტივობის საკითხი.

კონკურსის გამოცხადება მიზნად ისახავს ადგილობრივი არასამთავრობო სექტორის  წახალისებას ისეთი მნიშვნელოვანი პროექტების უზრუნველსაყოფად, რომელიც ითვალისწინებს ახალგაზრდა ამომრჩევლების ინფორმირებისა და საარჩევნო პროცესში სამოქალაქო ჩართულობის დონის ამაღლების ხელშეწყობას.

ახალგაზრდებში თეორიული ცოდნის გაღრმავების, პრაქტიკული უნარ-ჩვევების განვითარებისა და მიღებული გამოცდილების გაზიარების ხელშეწყობის მიზნით, ზემოაღნიშნულ საკონკურსო თემატიკაზე წარმოდგენილი საგრანტო პროექტი უნდა მოიცავდეს შემდეგ სავალდებულო კომპონენტებს:

• N1 კომპონენტი: საინფორმაციო-სასწავლო პროგრამის განხორციელება ახალგაზრდა ამომრჩევლებისთვის - ბენეფიციარი შესაძლებელია იყოს მათ შორის შეზღუდული შესაძლებლობის მქონე ახალგაზრდა ამომრჩეველი, ასევე ეთნიკური უმცირესობების წარმომადგენელი ახალგაზრდები. სასურველია, სამიზნე ჯგუფის დაკომპლექტება მოხდეს გენდერული ასპექტების გათვალისწინებით.
• N2 კომპონენტი: პროექტის განმახორციელებელ არასამთავრობო ორგანიზაციასთან თანამშრომლობით, არჩევნების პოპულარიზაციაზე მიმართული ინიციატივ(ებ)ის განხორციელება პროექტის ბენეფიციარი ახალგაზრდა ამომრჩევლების უშუალო ჩართულობით.
• N3 კომპონენტი: სწავლების ცენტრის კონტრიბუციით ორგანიზებული კონკურსის „ახალგაზრდული დებატ-კლუბი 2018“ პროექტის ბენეფიციარი ახალგაზრდებისგან ჯგუფის დაკომპლექტება, გადამზადება და მონაწილეობის უზრუნველყოფა.

შენიშვნა საგრანტო პროექტით გასათვალისწინებელ სავალდებულო კომპონენტებთან დაკავშირებით:

• N1 კომპონენტი: საინფორმაციო-სასწავლო პროგრამა ორიენტირებული უნდა იყოს საარჩევნო განათლებაზე და მიზანშეწონილია მოიცავდეს ახალგაზრდა ამომრჩევლებისთვის ინფორმაციის მიწოდებას შემდეგ საკითხებზე: აქტიური მოქალაქეობა და არჩევნების გზით ქვეყნის მართვის პროცესში მონაწილეობის მნიშვნელობა, საქართველოში სახელმწიფო მოწყობისა და არჩევითი ორგანოების ფორმირების წესი (საარჩევნო სისტემები), საარჩევნო უფლებები და რეალიზება, გენდერული თანასწორობა არჩევნებში, მედია და არჩევნები, საარჩევნო ტექნოლოგიები და საერთაშორისო პრაქტიკა, არჩევნების პოპულარიზაციასთან დაკავშირებული სხვა საკითხები. მნიშვნელოვანია, რომ პროექტის ფარგლებში განსახორციელებელი საინფორმაციო/საგანმანათლებლო პროგრამების მოდელირება, სასწავლო მასალების შემუშავება და სასწავლო მეთოდოლოგიის შერჩევა-გამოყენება მოხდეს ახალგაზრდა ამომრჩევლების ასაკისა და ინტერესების შესაბამისად. მნიშვნელოვანია, შემუშავებულ საინფორმაციო-სასწავლო პროგრამაში/სილაბუსში მითითებული იყოს გამოყენებული წყარო, ლიტერატურა და ავტორი.
• N2 კომპონენტი: არჩევნების პოპულარიზაციაზე მიმართული ინიციატივ(ებ)ის ბენეფიციარი შეიძლება იყოს როგორც ახალგაზრდა ამომრჩეველი, ისე ნებისმიერი სხვა არჩევნებით დაინტერესებული პირი.
• N3 კომპონენტი: არასამთავრობო ორგანიზაციამ პროექტში უნდა გაითვალისწინოს სწავლების ცენტრის კონტრიბუციის პირობა, რომელიც უკავშირდება „ახალგაზრდული დებატ-კლუბი 2018“ ჩატარებას. არასამთავრობო ორგანიზაციამ დებატ-კლუბში მონაწილეობისთვის ბენეფიციარი ახალგაზრდებისგან უნდა დააკომპლექტოს ჯგუფი ხუთი წევრით, უზრუნველყოს მათი მომზადება და მონაწილეობა (ტრანსპორტირება) სწავლების ცენტრის მიერ თბილისში ორგანიზებულ კონკურსზე; აღნიშნული ხარჯი გათვალისწინებული უნდა იყოს პროექტის ბიუჯეტში (კონკუსი გაიმართება სამ ეტაპად: შესარჩევი ეტაპი, ნახევარფინალი, ფინალი). სწავლების ცენტრი უზრუნველყოფს კონკურსის „ახალგაზრდული დებატ-კლუბის 2018“ ჩატარების საორგანიზაციო ხარჯების ანაზღაურებას.

დებატ-კლუბის ჩატარების წესი დეტალურად ეცნობებათ დაფინანსებულ არასამთავრობო ორგანიზაციებს.

საგრანტო პროექტის ხანგრძლივობა: 2018 წლის 1 მაისი - 31 აგვისტო  (4 თვე)

საგრანტო პროექტის დაფინანსების ფარგლები: არაუმეტეს 30 000 ლარისა (პროექტის დაფინანსების შემთხვევაში თანხა გაიცემა ეტაპობრივად ხელშეკრულებით განსაზღვრულ ვადებში)

პირველი მიმართულების დაფინანსების ჯამური თანხა: 240 000 ლარი

მეორე მიმართულების საკონკურსო თემატიკა: პოლიტიკური პარტიების საარჩევნო შესაძლებლობების განვითარების ხელშეწყობა

2017 წელს სწავლების ცენტრის მიერ ორგანიზებული საგრანტო კონკურსის ფარგლებში დაფინანსებულ საგრანტო პროექტებში მონაწილე პოლიტიკური პარტიების წარმომადგენლებს შორის ჩატარებული გამოკითხვის შედეგების მიხედვით გამოიკვეთა პარტიებისთვის საარჩევნო საინფორმაციო-საგანმანათლებლო პროექტების გაგრძელების მოთხოვნა. ჩართული მხარეების საარჩევნო შესაძლებლობების განვითარების აუცილებლობა ასევე აღინიშნა საერთაშორისო სადამკვირვებლო ორგანიზაციების ანგარიშებში ასახულ რეკომენდაციებში.

გამოხატული მაღალი ინტერესისა და 2018 წელს გასამართი პრეზიდენტის არჩევნების  გათვალისწინებით, კონკურსის გამოცხადება მიზნად ისახავს ადგილობრივი არასამთავრობო სექტორის  წახალისებას ისეთი მნიშვნელოვანი საინფორმაციო-სასწავლო პროექტების განსახორციელებლად, რომელიც უზრუნველყოფს კონკურენტუნარიანი პოლიტიკური გარემოს განვითარების ხელშეწყობასა და ადამიანური რესურსის გაძლიერებას პოლიტიკური პარტიებისთვის, რომლებიც კანონმდებლობის შესაბამისად არჩევნებისთვის აღიჭურვებიან უფლებით დანიშნონ წევრები ან/და წარმომადგენლები საოლქო საარჩევნო კომისიებსა და საუბნო საარჩევნო კომისიებში.     

საკონკურსო თემატიკით განსაზღვრული მიზნიდან გამომდინარე, სავალდებულოა, რომ არასამთავრობო ორგანიზაციის მიერ წარმოდგენილი საგრანტო პროექტი ითვალისწინებდეს პოლიტიკური პარტიებისთვის სასწავლო პროგრამის განხორციელებას, რომელიც მოიცავს ქვემოთ ჩამოთვლილ ყველა მოდულს:

• პოლიტიკური პარტიების სტრუქტურა, მენეჯმენტი (საერთაშორისო პრაქტიკა) და უფლებრივი მდგომარეობა;
• პოლიტიკური კულტურა არჩევნებში, დებატები და საარჩევნო ეთიკა (პროფესიული, ეთიკური სტანდარტები და კომუნიკაცია საარჩევნო პროცესში ჩართულ მხარეებთან);
• პარტიებისა და კანდიდატების თანაბარი შესაძლებლობები საარჩევნო პროცესში (მნიშვნელოვანია მოდული მათ შორის მოიცავდეს შემდეგ საკითხებს - ხელმისაწვდომობა ადმინისტრაციულ რესურსებსა და საეთერო/სარეკლამის დროზე);
• საზოგადოებასთან ურთიერთობის მექანიზმები (მნიშვნელოვანია მოდული მათ შორის მოიცავდეს შემდეგ საკითხებს - მედიასთან ურთიერთობა და სოციალური ქსელების გამოყენება, პოლიტიკური და საარჩევნო პიარი);
• პარტიის როლი უსაფრთხო საარჩევნო გარემოს უზრუნველყოფაში;
• ქალთა მონაწილობის გაზრდის შიდა პარტიული მექანიზმები;
• პერსონალის და მოხალისეების მართვა (მნიშვნელოვანია მოდული მათ შორის მოიცავდეს შემდეგ საკითხებს - აქტიური მოქალაქეობა და ახალგაზრდების ჩართულობა საარჩევნო პროცესში, რეგიონული წარმომადგენლობების განვითარება);
• პოლიტიკური პარტიების საარჩევნო შესაძლებლობების განვითარებაზე ორიენტირებული დამატებით ნებისმიერი სხვა სასწავლო მოდული, გარდა ქვემოთ მოცემული მოდულებისა, რომლის სწავლებას უზრუნველყოფს სწავლების ცენტრი კონტრიბუციის ფორმატში.

შენიშვნა:

• ზემოაღნიშნული სასწავლო პროგრამის წარმოდგენასთან დაკავშირებით პირობის შეუსრულებლობა საკონკურსო დოკუმენტაციის კონკურსიდან მოხსნის საფუძველია.
• სასწავლო პროგრამის ფარგლებში არასამთავრობო ორგანიზაციის მიერ ჩასატარებელი ტრენინგების ხანგრძლივობა უნდა განისაზღვროს არანაკლებ 21 საათისა (იგულისხმება სატრენინგო საათები, რომელშიც არ შედის შესვენების დრო).
• შეფასების მიზნებისთვის მნიშვნელოვანია, რომ სასწავლო პროგრამაში გაწერილი იყოს შესაბამისი მოდულის მიზანი, შინაარსი, სწავლების შედეგი, მეთოდოლოგია, ხანგრძლივობა და სწავლების ჩატარებაზე პასუხისმგებელი პირის შესახებ ინფორმაცია (იხ. ნიმუში). მნიშვნელოვანია, შემუშავებულ სასწავლო პროგრამაში/სილაბუსში მითითებული იყოს გამოყენებული წყარო, ლიტერატურა და ავტორი.

საგრანტო კონკურსში გამარჯვებულად გამოვლენილ არასამთავრობო ორგანიზაციასთან კოორდინაციის პირობებში, პროექტის განხორციელების პროცესში უზრუნველყოფილი იქნება კონტრიბუცია სწავლების ცენტრის მხრიდან სამიზნე ჯგუფებისათვის შემდეგი მოდულების სწავლების კუთხით:

• საარჩევნო ადმინისტრაციის მუშაობის წესი, არჩევნების ორგანიზება (საარჩევნო ციკლი) და კენჭისყრის დღე;
• საჩივრის/განცხადების შედგენის საფუძველი და ტექნიკა.

შენიშვნა:

• პროექტის ფარგლებში სწავლების ცენტრის მიერ კონტრიბუციის სახით ჩასატარებელი ტრენინგების ხანგრძლივობა შეადგენს 6 საათს (გაითვალისწინეთ, რომ არასამთავრობო ორგანიზაციის მიერ სავალდებულოდ განსახორციელებელი სასწავლო პროგრამის ხანგრძლივობაში, რომელიც შეადგენს არანაკლებ 21 საათს, არ შედის აღნიშნული 6 საათი).
• არასამთავრობო ორგანიზაციამ პროექტში უნდა გაითვალისწინოს სწავლების ცენტრის კონტრიბუციის პირობა. სწავლების ცენტრის თანამშრომლების მიერ სასწავლო კურსის განხორციელებასთან დაკავშირებით გაწეული შრომა და სამივლინებო ხარჯები ანაზღაურდება სწავლების ცენტრის მიერ.

საგრანტო პროექტის სამიზნე ჯგუფები

პოლიტიკური პარტიების ადამიანური რესურსის საარჩევნო შესაძლებლობებისა და კონკურენტუნარიანი პოლიტიკური გარემოს განვითარების ხელშეწყობის მიზნით,  პოლიტიკური პარტიების წარმომადგენლებით სამიზნე ჯგუფების დაკომპლექტების პროცესში არასამთავრობო ორგანიზაცია ვალდებულია შეასრულოს ქვემოთ მოცემული ყველა მოთხოვნა, კერძოდ:

ა)   სწავლების ცენტრს უნდა წარედგინოს:  

• პროექტში მონაწილეობის შესახებ მოწვევის წერილის 18 კვალიფიციური პოლიტიკური პარტიისთვის დაგზავნის დამადასტურებელი დოკუმენტი და მოწვევის წერილის შესაბამისად პროექტში მონაწილეობის თაობაზე არანაკლებ 9 კვალიფიციური პარტიიდან მიღებული თანხმობის წერილი;
• ბოლო ორი წლის მანძილზე გამართულ ერთ-ერთ საერთო არჩევნებში მონაწილე არანაკლებ 4 არაკვალიფიციური პარტიისთვის პროექტში მონაწილეობის შესახებ მოწვევის წერილის დაგზავნის დამადასტურებელი დოკუმენტი და მოწვევის წერილის შესაბამისად პროექტში მონაწილეობის თაობაზე თანხმობის მიღების შემთხვევაში, აღნიშნული თანხმობის წერილი.

ბ)  პარტიებიდან მიღებული თანხმობის წერილები ხელმოწერილი უნდა იყოს პარტიების ხელმძღვანელობაზე/წარმომადგენლობაზე უფლებამოსილი პირის მიერ. პარტიებისთვის დაგზავნილი მოწვევის წერილები და პარტიებიდან მიღებული თანხმობის წერილები სწავლების ცენტრს უნდა წარედგინოს არასამთავრობო ორგანიზაციის ელექტრონული ფოსტის მისამართზე აღნიშნული მოთხოვნის შესახებ შეტყობინების განხორციელებიდან არა უგვიანეს 5 სამუშაო დღის ვადაში (წერილების წარმოდგენა უნდა მოხდეს ნაბეჭდი და ელექტრონული ფორმით (CD)).

შენიშვნა: ზემოაღნიშნული მოთხოვნების შეუსრულებლობის შემთხვევაში, კომისია იღებს გადაწყვეტილებას არასამთავრობო ორგანიზაციის დაფინანსებაზე უარის თქმის შესახებ.

გაითვალისწინეთ:  თანაბარი პირობებისა და პროპორციულობის უზრუნველსაყოფად, კონკურსის მიზნებისთვის 18 კვალიფიციური პოლიტიკური პარტიიდან იმ პარტიებს, რომლებსაც აქვთ კანონმდებლობის შესაბამისად არჩევნებისთვის საარჩევნო კომისიებში წევრების დანიშვნის უფლება (4 პარტია),  უნდა მიეცეთ შესაძლებლობა შესაბამის არეალში (არეალები იხილეთ ქვემოთ) მოქმედ თითოეულ საოლქო საარჩევნო კომისიასთან მიმართებაში სამიზნე ჯგუფში წარადგინონ პარტიის ორი წარმომადგენელი, ხოლო დანარჩენ პარტიებს (როგორც კვალიფიციურ, ისე არაკვალიფიციურ პარტიებს) - თითო წარმომადგენელი.

საგრანტო პროექტის განხორციელების არეალი და დაფინანსების ფარგლები

საგრანტო პროექტისთვის, რომელიც კონკურსის მიზნებისთვის მოიცავს პოლიტიკური პარტიებიდან წარდგენილი წარმომადგენლების მაქსიმალურ რაოდენობას (26 წარმომადგენელს ქვემოთ განსაზღვრული არეალის ფარგლებში მოქმედ თითო საოლქო საარჩევნო კომისიაზე გათვლით), დაფინანსების ფარგლები განისაზღვრება შემდეგი ოდენობით:  

• თბილისი (მთაწმინდა, ვაკე, საბურთალო, კრწანისი, ჩუღურეთი) - არაუმეტეს 97 500 ლარისა;
• თბილისი (ისანი, სამგორი, დიდუბე, ნაძალადევი, გლდანი) - არაუმეტეს 97 500 ლარისა;
• კახეთი (საგარეჯო, გურჯაანი, სიღნაღი, დედოფლისწყარო) – არაუმეტეს 78 000 ლარისა;
• კახეთი (ყვარელი, ლაგოდეხი, თელავი, ახმეტა) – არაუმეტეს 78 000 ლარისა;
• ქვემო ქართლი (რუსთავი, გარდაბანი, მარნეული, წალკა, თეთრიწყარო, ბოლნისი, დმანისი) - არაუმეტეს 136 500 ლარისა;
• შიდა ქართლი (კასპი, გორი, ქარელი, ხაშური) - არაუმეტეს 78 000 ლარისა;
• მცხეთა-მთიანეთი (მცხეთა, თიანეთი, დუშეთი, ყაზბეგი) - არაუმეტეს 78 000 ლარისა;
• სამცხე-ჯავახეთი (ბორჯომი, ახალციხე, ადიგენი, ასპინძა, ახალქალაქი, ნინოწმინდა) - არაუმეტეს 117 000 ლარისა;
• იმერეთი (ტყიბული, თერჯოლა, ზესტაფონი, ხარაგაული, საჩხერე, ჭიათურა) - არაუმეტეს 117 000 ლარისა;
• იმერეთი (ბაღდათი, ქუთაისი, სამტრედია, ვანი, ხონი, წყალტუბო) - არაუმეტეს 117 000 ლარისა;
• რაჭა-ლეჩხუმი და ქვემო სვანეთი (ონი, ამბროლაური, ცაგერი, ლენტეხი) - არაუმეტეს 78 000 ლარისა;
• სამეგრელო და ზემო სვანეთი (აბაშა, მარტვილი, სენაკი, ჩხოროწყუ, ხობი) - არაუმეტეს 97 500 ლარისა;
• სამეგრელო და ზემო სვანეთი (ფოთი, ზუგდიდი, წალენჯიხა, მესტია) - არაუმეტეს 78 000 ლარისა;
• გურია (ოზურგეთი, ჩოხატაური, ლანჩხუთი) - არაუმეტეს 58 500 ლარისა;
• აჭარა (ქობულეთი, ბათუმი, ხელვაჩაური, ხულო, ქედა, შუახევი) - არაუმეტეს 117 000 ლარისა.

შენიშვნა:

• არასამთავრობო ორგანიზაცია უფლებამოსილია გამოცხადებული კონკურსის ფარგლებში წარადგინოს მხოლოდ ერთი საგრანტო პროექტი, საოლქო საარჩევნო კომისიების მიხედვით დაყოფილ ერთ რომელიმე არეალში.
• კონკურსის მიზნებისთვის საოლქო საარჩევნო კომისიების მიხედვით დაყოფილ თითოეულ არეალში გამოვლინდება ერთი გამარჯვებული პროექტი.
• პროექტის დაფინანსების შემთხვევაში თანხა გაიცემა ეტაპობრივად ხელშეკრულებით განსაზღვრულ ვადებში.
• თუ პარტიებიდან პროექტში მონაწილეობის შესახებ მიღებული თანხმობის წერილებიდან გამოიკვეთება, რომ შემცირდა პროექტით გათვალისწინებულ სამიზნე ჯგუფებში მონაწილეთა რაოდენობა, არასამთავრობო ორგანიზაცია ვალდებულია სწავლების ცენტრს წარუდგინოს პროექტის კორექტირებული ბიუჯეტი ზემოაღნიშნული დაანგარიშების პრინციპის გათვალისწინებით. არასამთავრობო ორგანიზაციამ კორექტირებული ბიუჯეტი სწავლების ცენტრს უნდა წარუდგინოს პარტიებისთვის დაგზავნილ მოწვევისა და პარტიებიდან მიღებული თანხმობის წერილებთან ერთად (ნაბეჭდი და ელექტრონული ფორმით (CD)). აღნიშნული მოთხოვნის შეუსრულებლობის შემთხვევაში, კომისია იღებს გადაწყვეტილებას არასამთავრობო ორგანიზაციის დაფინანსებაზე უარის თქმის შესახებ.

საგრანტო პროექტის ხანგრძლივობა: 2018 წლის 1 მაისი - 31 აგვისტო  (4 თვე)

მეორე მიმართულების დაფინანსების ჯამური თანხა: 1 423 500 ლარი

ვის შეუძლია საგრანტო კონკურსში მონაწილეობა 

კონკურსში მონაწილეობა შეუძლიათ კონკურსის გამოცხადებამდე საქართველოს კანონმდებლობის შესაბამისად რეგისტრირებულ ადგილობრივ არასამეწარმეო (არაკომერციულ) იურიდიულ პირებს (შემდგომში - არასამთავრობო ორგანიზაცია).

კონკურსში მონაწილეობის უფლება არ აქვთ იმ არასამთავრობო ორგანიზაციებს, რომელთა ხელმძღვანელი პირები ან/და კონკურსში წარსადგენად შემუშავებული პროექტის განმახორციელებელი პირები არიან: საქართველოს ცენტრალური საარჩევნო კომისიის წევრი; ცესკოს აპარატის სტრუქტურული ერთეულის ხელმძღვანელი; სწავლების ცენტრის ხელმძღვანელი, მისი მოადგილე; სწავლების ცენტრის სტრუქტურული ერთეულის ხელმძღვანელი; საგრანტო საკონკურსო კომისიის,  კომისიის სამდივნოსა და მონიტორინგის ჯგუფის წევრი. არასამთავრობო ორგანიზაციის ხელმძღვანელ პირებში იგულისხმება მეწარმეთა და არასამეწარმეო (არაკომერციული) იურიდიული პირების რეესტრის ამონაწერის თანახმად არასამთავრობო ორგანიზაციის ხელმძღვანელობაზე/წარმომადგენლობაზე უფლებამოსილი პირები.

საგრანტო კონკურსში წარსადგენი საკონკურსო დოკუმენტაცია

საგრანტო კონკურსში მონაწილეობის მისაღებად არასამთავრობო ორგანიზაციამ უნდა წარადგინოს შემდეგი საკონკურსო დოკუმენტაცია მითითებული წესის დაცვით:

ა) საგრანტო განაცხადი დანართი №1-ის ფორმის დაცვით (ნაბეჭდი და ელექტრონული ფორმით (CD)); 

ბ) საგრანტო კონკურსის გამოცხადების (2018 წლის 8 თებერვლის) შემდეგ მომზადებული ამონაწერი მეწარმეთა და არასამეწარმეო (არაკომერციული) იურიდიული პირების რეესტრიდან, რომლის მონაცემებით დასტურდება, რომ არასამთავრობო ორგანიზაციას არ გააჩნია შემდეგი  ვალდებულებები: ყადაღა/აკრძალვა, საგადასახადო გირავნობა, მოვალეთა რეესტრი (ნაბეჭდი ფორმით);

გ) საქართველოს კანონმდებლობის შესაბამისად დამოწმებული სადამფუძნებლო დოკუმენტი (წესდება, დებულება ან სხვა) (ნაბეჭდი ფორმით).

შენიშვნა: კონკურსში მონაწილეობის მისაღებად არასამთავრობო ორგანიზაცია უფლებამოსილია გამოცხადებული კონკურსის ფარგლებში წარადგინოს მხოლოდ ერთი საგრანტო განაცხადი.

განმხილველი ორგანო

საგრანტო საკონკურსო კომისია იღებს გადაწყვეტილებას საკონკურსო დოკუმენტაციის განუხილველად დატოვების შესახებ, არასამთავრობო ორგანიზაციის დაფინანსების/დაფინანსებაზე უარის თქმის შესახებ, საკონკურსო დოკუმენტაციის კონკურსიდან მოხსნის შესახებ.  საგრანტო საკონკურსო კომისია აღნიშნულ გადაწყვეტილებებს იღებს საკონკურსო დოკუმენტაციის წარმდგენი არასამთავრობო ორგანიზაციის წარმომადგენლის  სხდომაზე დაუსწრებლად.

საგრანტო საკონკურსო კომისიის წევრების მიერ საგრანტო პროექტების შეფასება ხორციელდება საკონკურსო დოკუმენტაციის შეფასების ფურცელში განსაზღვრული კრიტერიუმების შესაბამისად (იხ. დანართი №2).

საგრანტო კონკურსის შედეგების საჯაროობა

საგრანტო კონკურსის მონაწილეებს კონკურსის შედეგები ეცნობებათ მათ ელექტრონული ფოსტის მისამართზე შეტყობინების გაგზავნის ფორმით. ინფორმაცია საგრანტო საკონკურსო კომისიის გადაწყვეტილებით დაფინანსებული არასამთავრობო ორგანიზაციების შესახებ ასევე განთავსდება ცესკოსა და სწავლების ცენტრის ვებ–გვერდებზე: www.cesko.ge; www.electionreforms.ge

საგრანტო კონკურსის გრაფიკი

• კონკურსის გამოცხადება: 8 თებერვალი, 2018 წელი;
• საკონკურსო დოკუმენტაციის წარდგენის ვადა: 2018 წლის 8 თებერვლიდან - 22 თებერვლის ჩათვლით (შაბათ-კვირის გარდა), 10:00 საათიდან - 18:00 საათამდე, მისამართზე: თბილისი, დავით აღმაშენებლის ხეივანი მე-13 კილომეტრი, (ცესკოს შენობა) მეხუთე სართული;
• საინფორმაციო შეხვედრები საკონკურსო დოკუმენტაციის წარდგენის წესთან დაკავშირებით: 2018 წლის 13 და 16 თებერვალი, 14:00 საათი, მისამართზე: თბილისი, დავით აღმაშენებლის ხეივანი მე-13 კილომეტრი (ცესკოს შენობა).

„გრანტის გაცემის წესი“ იხილეთ ბმულზე.

დამატებითი ინფორმაციისთვის დაგვიკავშირდით: 261 21 11 (17)