საარჩევნო ადმინისტრაციის ინსტიტუციური გაძლირების ხელშეწყობის მიზნით, სწავლების ცენტრმა და ცესკოს იურიდიულმა დეპარტამენტმა შეიმუშავა ახალი სასწავლო პროგრამა, რომელიც ითვალისწინებს სამართლებრივ საკითხებზე ტრენინგების ჩატარებას საოლქო საარჩევნო კომისიების ხელმძღვანელი პირებისთვის.

სწავლების ფარგლებში მონაწილეები განიხილავენ ისეთ საკითხებს როგორიცაა: კენჭისყრის დღეს განცხადება/საჩივრის განხილვასთან დაკავშირებული ადმინისტრაციული წარმოება საოლქო საარჩევნო კომისიაში, ადმინისტრაციულ სამართალდარღვევებთან დაკავშირებით გადაწყვეტილებების მომზადება, დისციპლინური პასუხისმგებლობის ზომების გამოყენების ერთგვაროვანი პრაქტიკა და ა.შ. 

ტრენინგი პრაქტიკულ სწავლებაზეა ორიენტირებული. მონაწილეები ასევე განიხილავენ ეუთოს (OSCE) დემოკრატიული ინსტიტუტებისა და ადამიანის უფლებების ოფისის საერთაშორისო საარჩევნო სადამკვირვებლო მისიის  ანგარიშებს და იქ გამოთქმულ რეკომენდაციებს საოლქო საარჩევნო კომისიების საქმიანობის ჭრილში.

სასწავლო პროექტი 2017 წლის 15 ივნისიდან 26 ივნისის ჩათვლით პერიოდში განხორციელდება. ტრენინგი 4 ეტაპად 7 ჯგუფს ჩაუტარდება, რომლის შემადგენლობაში შედიან საოლქო საარჩევნო კომისიების თავმჯდომარეები, მდივნები, ასევე, ცესკოს საარჩევნო პროცესების მართვის დეპარტამენტის წარმომადგენლები და რეგიონული კოორდინატორები.