საარჩევნო ადმინისტრაცია  ინიციატივის „ვესაუბრებით ამომრჩევლებს“ შედეგებს განიხილავს. პროექტის შემუშავება ცესკოს თავმჯდომარის ბრძანებით შექმნილმა სამუშაო ჯგუფმა უზრუნველყო, რომლის შემადგენლობაში სწავლების ცენტრის დირექტორი და ცესკოს სტრუქტურული ერთეულების ხელმძღვანელი პირები შედიოდნენ. აღნიშნული ინიციატივა მიზნად ისახავდა 2017 წელს გასამართ არჩევნებთან დაკავშირებით ამომრჩეველთა ინფორმირებას, საარჩევნო ადმინისტრაციასა და ამომრჩევლებს შორის კომუნიკაციის გაძლიერებასა და ამომრჩევლებისთვის შეთავაზებული სერვისების გაუმჯობესებას.

ცესკოს ხელმძღვანელი პირები და სამუშაო ჯგუფის წევრები ეტაპობრივად მართავენ შეხვედრებს პროექტის განმახორციელებელ საოლქო საარჩევნო კომისიების წევრებთან, საუბრობენ მიღებულ გამოცდილებაზე და განიხილავენ მოსაზრებებს, რომლებიც ამომრჩეველთა მიერ პროექტის ფარგლებში გამოითქვა.

„საარჩევნო ადმინისტრაციამ ძალიან მნიშვნელოვანი ინიციატივა განახორციელა. ჩვენ, უშუალოდ საოლქო საარჩევნო კომისიებთან ერთად ვიარეთ სოფელ-სოფელ, შევხვდით ხალხს, დაახლოებით 450-მდე შეხვედრა ჩავატარეთ, როგორც მუნიციპალიტეტებში, ისე სოფლებში. გარდა იმისა, რომ თვითმმართველობის არჩევნების თაობაზე გავიზიარეთ ამომარჩევლელთა მოსაზრებები, ასევე მივაწოდეთ მათ ამომწურავი ინფორმაცია სარჩევნო ადმინისტრაციის შესახებ და დღეს უკვე ვაჯამებთ მოქალაქეებთან შეხვედრების შედეგებს. ჩვენ გვაქვს ძალიან მნიშვნელოვანი შედეგები, - ერთის მხრივ ამომრეჩევლთა ინფორმირების, მეორეს მხრივ კი, რა თქმა უნდა, ეფექტური კომუნიკაციის, ურთიერთობის და ამომრჩეველთან უფრო ახლოს კონტაქტის თვალსაზრისით“ - განაცხადა ცესკოს თავმჯდომარემ.

პროექტის ფარგლებში პირველ ეტაპზე საოლქო საარჩევნო კომისიების წევრებმა და მოხალისეებმა მუნიციპალიტეტების ცენტრებსა და სოფლების საზოგადოებრივი თავშეყრის ადგილებში ამომრჩევლებთან საინფორმაციო ხასიათის შეხვედრები გამართეს. მათ მოსახლეობას თვითმმართველობის არჩევნების შესახებ საინფორმაციო ბარათები დაურიგეს და საკუთარი საარჩევნო უფლებების თაობაზე ესაუბრნენ. მოქალაქეებს შესაძლებლობა ჰქონდათ საარჩევნო ადმინისტრაციის მიერ შეთავაზებული სერვისებისა და საჭიროებების შესახებ დაეფიქსირებინათ საკუთარი აზრი ამომრჩეველთა მოსაზრებების ბარათში.

გარდა ამისა, საოლქო საარჩევნო კომისიებში გაიმართა საჯარო შეხვედრები - „ამომრჩევლის დღე“. შეხვედრაზე მისულ დაინტერესებულ პირებს საოლქო საარჩევნო კომისიების წარმომადგენლები აწვდიდნენ ინფორმაციას ადგილობრივი თვითმმართველობის ორგანოების არჩევნების მნიშვნელობის, საარჩევნო ადმინისტრაციის საქმიანობისა და ამომრჩევლებისთვის შეთავაზებული სერვისების შესახებ.

პროექტი 24 აპრილიდან 31 მაისის პერიოდში, საქართველოს მასშტაბით მუნიციპალიტეტების ცენტრებსა და სოფლებში, საოლქო საარჩევნო კომისიების 340 წევრისა და 491 მოხალისის მონაწილეობით განხორციელდა. საერთო ჯამში 73 საარჩევნო ოლქის ტერიტორიაზე  450 შეხვედრა გაიმართა.

ამ ეტაპზე პროექტის შედეგების განხილვა  აღმოსავლეთ საქართველოს საოლქო საარჩევნო კომისიების თავმჯდომარეებთან და მდივნებთან, ბორჯომში, გაიმართა. შეხვედრები ზემოაღნიშნული ინიციატივის თაობაზე ასევე იგეგმება თბილისის და დასავლეთ საქართველოს საოლქო საარჩევნო კომისიების წარმომადგენლებთან.