2017 წლის 19 მაისს საჯარო სკოლებში დასრულდა საინფორმაციო-სასწავლო კურსი „არჩევნები და ახალგაზრდა ამომრჩეველი“, რომელიც ცესკომ და სწავლების ცენტრმა საქართველოს განათლებისა და მეცნიერების სამინისტროსთან თანამშრომლობით განახორციელა. სასწავლო კურსის მიზანია ახალგაზრდებში სამოქალაქო ცნობიერების ამაღლება და სამოქალაქო პასუხისმგებლობის გაზრდა. პროექტი განხორციელდა საქართველოს 68 მუნიციპალიტეტში, მათ შორის, ეთნიკური უმცირესობებით დასახლებულ მუნიციპალიტეტში და მაღალმთიან რეგიონში.

პროექტში მონაწილეობა მიიღო 93 საჯარო სკოლის XI-XII კლასის 1645-მა მოსწავლემ, რომლებსაც გადაეცათ სერტიფიკატები. საინფორმაციო-სასწავლო კურსის ფარგლებში საჯარო სკოლების მოსწავლეები გაეცნენ ისეთ მნიშვნელოვან საკითხებს, როგორიცაა: არჩევნების ისტორიული ექსკურსი და თანამედროვეობა, არჩევნები და დემოკრატია, საარჩევნო ადმინისტრაცია და ამომრჩეველი, არჩევნებში ჩართული სხვა მხარეები. კურსის ბოლოს მოსწავლეებმა ჩაატარეს იმიტირებული არჩევნები, რომლის პირობებშიც გამოვლინდა თავად მოსწავლეების მიერ ჯანმრთელი ცხოვრების წესის პოპულარიზაციის მიმართულებით შემუშავებული სლოგანებიდან გამარჯვებული სლოგანი.

ცესკო და სწავლების ცენტრი აღნიშნულ პროექტს 2015 წლიდან ახორციელებს, სასწავლო კურსი 241 საჯარო სკოლის 4000-ზე მეტმა მოსწავლემ გაიარა.