ამომრჩეველთა სიების დაზუსტების უზრუნველყოფის კომისიასა და საარჩევნო სისტემების განვითარების, რეფორმებისა და სწავლების ცენტრს შორის 2012 წლის 15 მარტს გაფორმებული ხელშეკრულების ფარგლებში სწავლების ცენტრმა დაიწყო პროექტ ”კარდაკარისათვის” ტრენერებისა და რეგისტრატორების ტრენინგის ორგანიზება.

სწავლების ცენტრის მიერ შემუშავდა ტრენინგების ჩატარების მეთოდოლოგია, რომელიც მოიცავს ჯგუფურ მუშაობას, როლურ თამაშებსა და ინტერაქტივს. თითოეული ტრენერისა და რეგისტრატორისათვის მომზადდა დამხმარე სახელმძღვანელოები, პრაქტიკული სავარჯიშოები და თვალსაჩინო მასალები, რომლებიც დაეხმარება მათ კვალიფიციურად მოემსახურონ ამომრჩევლებს, უკეთ შეისწავლონ და განახორციელონ საკუთარი უფლებები და მოვალეობები.

სასწავლო კურსი ტარდება ორ დონიანი ”კასკადური” მეთოდით. პირველი ეტაპი 19 - 21 მარტს სასტუმრო ,,ქორთიარდ მერიოტში” გაიმართა, სადაც მოსამზადებელი კურსი გაიარა ცენტრის მიერ შერჩეულმა 38 ტრენერმა,  რომლებიც პროექტის მეორე ეტაპზე უზრუნველყოფენ 11 100 რეგისტრატორის გადამზადებას. აღნიშნული რეგისტრატორები პროექტის ფარგლებში, კარდაკარის მეთოდით განახორციელებენ ამომრჩეველთა მონაცემების გადამოწმებასა და დაზუსტებას საქართველოს 11 რეგიონსა და 73 საარჩევნო ოლქში.