ცენტრალურმა საარჩევნო კომისიამ და სწავლების ცენტრმა გრიგოლ რობაქიძის სახელობის უნივერსიტეტის სამართლის სკოლის სტუდენტებს უმასპინძლეს. მათ, ცესკოს თავმჯდომარე თამარ ჟვანია შეხვდა, რომელმაც ახალგაზრდებთან საარჩევნო ადმინისტრაციის საქმიანობაზე, არჩევნების მნიშვნელობაზე, ამომრჩევლებისთვის ცესკოს მიერ შეთავაზებულ სერვისებზე ისაუბრა და 2017 წლის თვითმმართველობის არჩევნების შესახებ მიაწოდა ინფორმაცია.

საკუთარი საქმიანობის შესახებ სტუმრებს ინფორმაცია მიაწოდეს სწავლების ცენტრის დირექტორის მოადგილემ და კოორდინაციის, დაგეგმვისა და ანგარიშგების დეპარტამენტის უფროსმა.

სტუდენტებმა ცესკოში განთავსებული ისტორიული ფოტო გამოფენაც დაათვალიერეს, რომელიც ქვეყნის საარჩევნო ისტორიას ასახავს. ცესკოში მუდმივმოქმედი გამოფენა საქართველოს საარჩევნო ისტორიის უნიკალურ მასალებს მოიცავს და 1918-2008 წლების პერიოდს ასახავს.

აღსანიშნავია, რომ დღევანდელი შეხვედრა ცესკოს სწავლების ცენტრსა და საქართველოს 19 უნივერსიტეტს შორის გაფორმებული მემორანდუმის ფარგლებში შედგა.