ცესკომ და სწავლების ცენტრმა დასავლეთ საქართველოს საოლქო საარჩევნო კომისიების წარმომადგენლებთან სამუშაო შეხვედრები გამართა. სამდღიანი განხილვების მთავარი თემა საარჩევნო ადმინისტრაციის ახალი პროექტი „ვესაუბრებით ამომრჩევლებს“ იყო.

პროექტის მნიშვნელობასა და მიზნებზე სამეგრელოს, სვანეთის, აჭარის, გურიის, იმერეთისა და რაჭა-ლეჩხუმის საოლქო საარჩევნო კომისიების წარმომადგენლებთან ცესკოს თავმჯდომარე თამარ ჟვანიამ ისაუბრა. ახალი პროექტი ამომრჩევლებთან გასვლითი შეხვედრების საშუალებით 2017 წლის არჩევნებთან დაკავშირებით მათი ცნობიერების ამაღლებას გულისხმობს და საოლქო საარჩევნო კომისიებსა და ამომრჩევლებს შორის უფრო მჭიდრო კომუნიკაციის ჩამოყალიბებას ემსახურება.

პროექტის განხორციელების დეტალები და სამომავლო აქტივობები მონაწილეებთან ერთად ცესკოს კოორდინაციის დაგეგმვისა და ანგარიშგების დეპარტამენტის უფროსმა, საზოგადოებასთან ურთიერთობის განყოფილების ხელმძღვანელმა და ცესკოს სწავლების ცენტრის სასწავლო პროგრამების განყოფილების უფროსმა განიხილეს.

სამუშაო შეხვედრაზე ასევე იმსჯელეს გენდერულ საკითხებზე არჩევნების ჭრილში. სამუშაო შეხვედრები IFES-ის მხარდაჭერით 19-21 აპრილს გაიმართა.