არჩევნების საერთაშორისო დღესთან დაკავშირებით ცენტრალურ საარჩევნო კომისიას და სწავლების ცენტრს შავი ზღვის საერთაშორისო უნივერსიტეტის სტუდენტები ეწვივნენ. სამართლის საერთაშორისო ურთიერთობების პროგრამის და საჯარო ადმინისტრირებისა და სახელმწიფო მმართველობის პროგრამის სტუდენტებს ცესკოს თავმჯდომარე თამარ ჟვანია და სწავლების ცენტრის დირექტორი ნათია ზაალიშვილი შეხვდნენ.
თამარ ჟვანიამ ახალგაზრდებს საარჩევნო ადმინისტრაციის საქმიანობა გააცნო და ქვეყნის დემოკრატიული განვითარებისთვის არჩევნების მნიშვნელობის შესახებ ესაუბრა. სწავლების ცენტრის დირექტორმა ნათია ზაალიშვილმა კი სტუდენტებს მიაწოდა ინფორმაცია ამომრჩეველთა განათლების კუთხით დანერგილი საარჩევნო სამოქალაქო განათლების პროგრამების შესახებ.
სტუდენტებმა ცესკოში გამოფენილი, საარჩევნო თემატიკაზე გადაღებული ისტორიული ფოტოები დაათვალიერეს. ახალგაზრდები ცესკოს სტრუქტურული ერთეულების ხელმძღვანელებსაც შეხვდნენ და სხვადასხვა დეპარტამენტების სამუშაო სპეციფიკას გაეცნენ.
არჩევნების საერთაშორისო დღე ყოველ წელიწადს თებერვლის პირველ კვირაში აღინიშნება.
