ცენტრალურმა საარჩევნო კომისიამ და სწავლების ცენტრმა 2016 წლის განმავლობაში განხორციელებული საქმიანობის შედეგები შეაჯამა. გასვლით სამუშაო შეხვედრაზე, რომელიც ბორჯომში გაიმართა, ცესკოს სტრუქტურული ერთეულების ხელმძღვანელებმა და სწავლების ცენტრის დირექტორმა ნათია ზაალიშვილმა მათ მიერ გაწეული სამუშაოს შესახებ ანგარიშები წარადგინეს.

შეხვედრის ფარგლებში განიხილეს საარჩევნო ადმინისტრაციის 2017 წლის სამოქმედო გეგმის პროექტი. გარდა ამისა, მონაწილეებმა არჩევნების სანდოობის რისკების მართვის გეგმაზეც იმსჯელეს, რომელიც მათ ცესკოს თავმჯდომარის მრჩეველმა ანა მიქელაძემ წარუდგინა.

სამუშაო შეხვედრაში ცესკოს ხელმძღვანელი პირები, სტრუქტურული ერთეულების ხელმძღვანელები, სწავლების ცენტრის დირექტორი და საარჩევნო სისტემების საერთაშორისო ფონდის (IFES) წარმომადგენლები მონაწილეობდნენ.

27-29 ნოემბერს გამართული შეხვედრა, საარჩევნო სისტემების საერთაშორისო ფონდთან (IFES) თანამშრომლობით და აშშ-ს საერთაშორისო განვითარების სააგენტოს (USAID) ფინანსური მხარდაჭერით განხორციელდა.