არჩევნების უსაფრთხოების საკითხებზე სამუშაო შეხვედრა გაიმართა „თბილისი მარიოტში“. შეხვედრას, ცენტრალური საარჩევნო კომისიის (ცესკო), ცესკოს სწავლების ცენტრის, შინაგან საქმეთა სამინისტროს, საარჩევნო სისტემების საერთაშორისო ფონდის (IFES) და არასამთავრობო ორგანიზაციების  წარმომადგენლები  ესწრებოდნენ.

როგორც ცესკოს თავმჯდომარე თამარ ჟვანიამ სიტყვით გამოსვლისას აღნიშნა, არჩევნების უსაფრთხოების უზრუნველყოფის კუთხით IFES-ის დახმარებით ცესკომ შინაგან საქმეთა სამინისტროსთან ერთად ეფექტური ღონისძიებების გატარება შეძლო. „USAID-ისა და IFES-ის მეშვეობით ჩვენ შევძელით სისტემურად დაგვენახა ამ მიმართულებით არსებული პრობლემები, გამოწვევები და დაგვესახა გადაჭრის გზები, - რა შეიძლებოდა გაგვეკეთებინა. ეს იყო ჩვენთვისაც სიახლე, პირველი მცდელობა და ჩვენს მიერ გადადგმული ნაბიჯები ამ მიმართულებით უკვე მოხვდა სხვადასხვა ანგარიშებში, როგორც პოზიტიური ქმედება. მადლობელი ვარ იმისთვის, რაც ამ ეტაპზე  შევძელით,  თუმცა ეს არ ნიშნავს, რომ არ შეგვიძლია უკეთესი  გავხადოთ ეს პროცესი. მინდა ხაზი გავუსვა, რომ პირველი მცდელობის ფონზე, ერთობლივი მუშაობისას, არჩევნების უსაფრთხოების კუთხით საკმაოდ კარგი შედეგები მივიღეთ, რისთვისაც მადლობა მინდა გადავუხადო ყველა იმ ადამიანს, ვინც ამ საქმეში საკუთარი წვლილი შეიტანა“,- განაცხადა თამარ ჟვანიამ.

არჩევნების უსაფრთხოების უზრუნველყოფის მიმართულებით საარჩევნო ადმინისტრაციის მიერ განხორციელებული საქმიანობის შესახებ პრეზენტაცია ცესკოს სწავლების ცენტრის ხელმძღვანელმა ნათია ზაალიშვილმა წარადგინა. მან ისაუბრა IFES-ის ექსპერტის რეკომენდაციებითა და საერთაშორისო პრაქტიკის გაზიარებით შემუშავებული ახალი სასწავლო მოდულის „არჩევნების უსაფრთხოების“ მნიშვნელობაზე, რომელშიც განისაზღვრა არჩევნების უსაფრთხოების მიზნით ეფექტიანი კომუნიკაციის ფორმები საარჩევნო ადმინისტრაციასა და სამართალდამცავ ორგანოებს შორის, ასევე, კენჭისყრის პროცესის შეუფერხებლად  მიმდინარეობის უზრუნველსაყოფად რისკების მართვის საშუალებები და რეაგირების გზები. ამ მოდულის ინტეგრირება მოხდა 2016 წლის 8 ოქტომბრის საქართველოს პარლამენტის არჩევნებისთვის შემუშავებულ საუბნო საარჩევნო კომისიების წევრთა სასწავლო პროგრამაში.

შეხვედრის მონაწილეებმა უსაფრთხოების უზრუნველყოფის მიმართულებით 2016 წლის პარლამენტის არჩევნებისთვის განხორციელებული აქტივობის შესახებ იმსჯელეს და აღნიშნულ პერიოდში მიღებულ გამოცდილებაზე ისაუბრეს. მონაწილეებს საკუთარი მოსაზრებები არასამთავრობო ორგანიზაციების წარმომადგენლებმაც გააცნეს. მათი რეკომენდაციით, არჩევნების უსაფრთხოების უზრუნველყოფის მიმართულებით მუშაობა და საარჩევნო პროცესში ჩართული პირების გადამზადება უნდა გაგრძელდეს.

საარჩევნო ადმინისტრაციამ საქართველოს შინაგან საქმეთა სამინისტროსთან პარტნიორობით და საარჩევნო სისტემების საერთაშორისო ფონდთან (IFES) თანამშრომლობით არჩევნების უსაფრთხოების საკითხებზე არაერთი შეხვედრა გამართა, ასევე გაფორმდა ურთიერთგაგების მემორანდუმი ცესკოსა და შსს-ს შორის. მემორანდუმის ფარგლებში როგორც საარჩევნო ადმინისტრაციის, ასევე შსს-ს წარმომადგენლებმა სპეციალური ტრენინგებიც გაიარეს. დღევანდელი შეხვედრა კი საარჩევნო სისტემების საერთაშორისო ფონდის ორგანიზებით შედგა.